Өлкә хөкүмәте биргән зур автобуска төялеп, татар Конгрессы, татар милли-мәдәни автономиясе, "Яшь буын” татар яшьләре оешмасы вәкилләре Екатеринбургка юл алдык. Анда бик җылы каршыладылар, шәп кунакханәгә урнашып, кичен шәһәрнең иң күркәм академия драма театрында тантаналы концертны тамаша кылдык һәм Свердловск өлкәсе губернаторы исеменнән оештырылган кабул итү мәҗлесендә катнаштык. Анда өлкә татар Конгрессының мәдәният департаменты җитәкчесе Вәлимә Ташкалова Татарстан президенты Рөстәм Миннехановка, өлкә татар милли-мәдәни автономиясе башкарма директоры Тимергали Мирасов Свердловск өлкәсе губернаторы Александр Мишаринга өлкәбез хөкүмәте исеменнән котлау хаты һәм истәлекле бүләкләр тапшырдылар.

«Төмән шәһәренең 46 нчы почта бүлекчәсендә кешеләр белән гел әйбәт мөгамәләдә эшли торган оператор бар, бәйрәмнәре уңаеннан аның турында язып чыксагыз иде», - дип килде безгә укучыбыз. Вакыт аз калуга да карамастан, мин почта бүлегенә киттем. Зур, якты бинада халык тулы, көн эссе, чиратта тору икеләтә авыр. Шуңа да һәркем ашыга, аларның күзләре ике операторга төбәлгән. Бу ике кыз тиз һәм төгәл эшләүләре белән игътибарымны җәлеп иттеләр. Почтада бер тавыш та юк, тыныч кына аңлаталар. Җитәкчеләренә мөрәҗәгать иткәч, ул аларның берсе укучыбыз мактаган Римма Хәвис кызы Егорова булуын әйтеп, бераз көтеп торуымны сорады. Чират озын иде. 

Газета-журналларга язылу кампаниясе апрель аенда башланды, һәрвакыттагыча, аның аеруча кызу вакыты июнь аена туры килде.