Түбән Тәүде районы, Чугунаево авыл хакимиятендә биш авыл хуҗалыгы эшли. Барысы да көчле, халыкны эш белән тәэмин итеп торучы хуҗалыклар. Шул биш хуҗалыкның берсе - бик уңышлы эш алып баручы  "Тавдинское земледелие”дә төрле милләт кешеләре хезмәт итә. Җаваплылыгы чикләнгән оешманы Александр Антонюк җитәкли, башкарма директоры – Юрий Антонюк. Монда хуҗалыкның оешуының беренче көненнән үк милләттәшебез  Шәйхулла Айдуллин, бераз соңрак килгән - Гомәр Калбаев, Мансур Сәйфуллин, Зиннур Хәлитуллин тырышып эшлиләр. Юрий Антонович Россия Федерациясенең  атказанган авыл хуҗалыгы хезмәткәре. 

Бүгенге көндә "Тавдинское земледелие” хуҗалыгы бөртекле культуралар, борчак үстерү һәм  бодай эшкәртү белән шөгыльләнә. Ул районда он җитештерүче иң зур предприятие. Монда чәчү мәйданнарын зурайтмыйлар, экспериментлар ясамыйлар, күләменә түгел, ә сыйфатлы күрсәткечләргә омтылалар. Ел саен 2300 гектар бодай чәчәләр. Мәсәлән, 2011 елда гектарыннан 30 центнер икмәк алдылар. Барлыгы 7 мең тонна уңышка ирештеләр. Хуҗалыкның өч "Дон”, бер "Енисей” комбайннары бар. Быел урып-җыю вакытында Басыйр Девятьяров эшчеләренең ярдәме кирәк булды. Бергәләп 1000 тонна бодай урдылар, 1250 тоннаны киптерделәр. Территориядә он тарту заводы эшли. Тәүлегенә тегермәндә үз бодаеннан 12 тонна он җитештерелә. Антонюкларның пешкән икмәкләрен ашап туймаслык, хуш исе тирә-юньгә тарала.  Ничек эшлисең, нәтиҗәсе дә шундый.

Д. ФӘХРЕТДИНОВА.