18 декабрь - энергетиклар көне

ООО "Тобольск – нефтехим” оешмасында 22 ел электромонтер хезмәтен үтәүче Рият Кирәй улы Мөхәммәтчин бу көннәрдә 65 яше тулу уңаеннан Мактау грамотасы белән бүләкләнде. Характеристикасында: «Үтә җаваплы, тирән белемле, югары квалификацияле хезмәткәр. Катлаулы йөкләмәләрне вакытында һәм югары сыйфатта башкара, хезмәттәшләренең хөрмәтен яулаган, алар өчен һәрьяктан да үрнәк булып тора», - дип язылган. 44 еллык хезмәт юлында Рият Кирәй улы күп төрле кыйммәтле кәгазьләр, медальләргә лаек булган. Ә иң югарысы - 2007 нче елның 11 нче маенда РФнең промышленность һәм энергетика министрлыгы тарафыннан аңа "Почетлы нефтехимик” дигән абруйлы исем бирелә. Эшчән, үз вазифасының бар нечкәлекләрен белгән 6 нчы разрядлы электромонтер бүген дә сафта.

Р.Мөхәммәтчин тумышы белән Тубыл районы, Олы Кундан авылыннан. Күкрәнде җидееллык мәктәбен тәмамлагач, Тубыл шәһәренең 15 нче урта мәктәбендә белем алуын дәвам итә. Шунда ук ул электромонтер һөнәрен үзләштереп, кулына таныклык ала һәм хезмәт юлын башлый. Илебез каршындагы бурычын 4 елга якын Германия илендә үти. Кайткач, Ләчек авылында электрчы булып эшли. Шул елларда кибетче Кәбир кызы  Факия белән тормыш корып, Заречный поселогына күчәләр. Биредә тормышларына ямь биреп ике егет тә бер кызлары туа. Тубылда нефть һәм химия комбинаты ачылгач, Рият Кирәй улы чакыру буенча шунда эшләргә килә. Бүгенге көндә Мөхәммәтчиннар гаиләсендә 4 онык үсә. Факия апа 41 ел гомер иткән тормыш иптәше турында тыйнак кына: " Бу дөньяга ул минем бәхетем өчен килгән - үзе сабыр, мәрхәмәтле, алтын куллы, ярдәмчел, белемле... Оныкларын өзелеп ярата. Эштән кайтуын алар да сагынып көтеп алалар. Ул аларга дәрес әзерләргә булыша, түгәрәкләргә йөртә”, - дип сөйләде. Рият Кирәй улын һәм барлык энергетикларны һөнәри бәйрәмнәре уңаеннан чын күңелдән котлап, изге теләкләр юллыйбыз.

Р.КАНГАЗИНА.