Татарстан Республикасыннан мәдәният министры Айрат Сибагатуллин җитәкчелегендәге делегация нәкъ менә шуңа әзерлек кысаларында өлкәбез җитәкчеләре белән сөйләшергә килде. Делегация составында Түбән Кама районы башкарма комитеты җитәкчесе урынбасары Марат Сәмигуллин, мәдәният идарәсе начальнигы Луиза Шәйхетдинова, министрлыкның регионара һәм милләтара хезмәттәшлек, күргәзмәләр эшчәнлеге бүлеге консультанты Ирина Овсепян, Татарстан дәүләт җыр һәм бию ансамбле сәнгать җитәкчесе Айрат Хәметов та бар иде. Алар өлкә милләтләр эшләре комитеты рәисе Евгений Воробьев, мәдәният департаменты директоры Евгений Негинский катнашындагы киңәшмәдә федераль сабантуйны үткәрүнең программасы, урыны, көне һәм башкалар турында сүз алып бардылар. Аннары Төмән дәүләт драма театры, филармониясе, "Геолог” стадионы, өлкә фәнни китапханәсе белән таныштылар.