Ике көн буена "Төзүче” милләтләр мәдәнияте сараенда Төмән өлкәсе үзешчән сәнгать коллективларының сайлап алу конкурсы барды. Жюри әгъзалары биредә  вокал, инструменталь башкару, хореография, нәфис сүз, милли йорт алды номанацияләре буенча тиешле бәя бирделәр.

Ә бәйрәмнең иң мөһим өлеше – гала-концерт Төсле бульварның матур итеп бизәлгән мәйданында нинди генә милләт халыкларын җыймады. Алар барысы да милли киемнәрдән һәм  бизәкле чатырларда урнашып, килгән һәрбер кешене милли ризыклар белән каршы алып, сыйлап, гореф-гадәтләрен, көнкүрешләрен тәкъдим иттеләр, шулай ук декоратив-кулланма сәнгать эшләренә дә бәя бирергә мөмкин булды.

Җыелган халыкны бәйрәм белән котларга милләтләр эшләре буенча өлкә комитеты рәисе Е.Воробьев, өлкә Думасы рәисе урынбасары Г.Корепанов, өлкә татар милли-мәдәни автономиясе рәисе Р.Зиганшин һәм башка милли-мәдәни оешма җитәкчеләре килгәннәр иде.  Е.Воробьев халыкка фестивальнең әһәмиятен, төрле милләт халыклары арасындагы дуслык мөнәсәбәтенең  мөһимлеген һәм өлкә губернаторы В.Якушевның  тәбрикләүләрен дә җиткерде.

Матур итеп бизәлгән сәхнәдән гала-концертка үткән коллективлар, җырчылар үзләренең  иң яхшы номерларын югары дәрәҗәдә тәкъдим иттеләр.

Быел финалга үткән милләттәшләребез дә үзләрен сынатмадылар – сәләтләрен менә дигән итеп күрсәттеләр. Менә алар: өлкә татар автономиясеннән – "Инструменталь башкару, соло” номинациясендә милли уен коралларында татар халык көйләрен башкаручы Әбүзәр Миннебаев I нче дәрәҗәдәге дипломга, Илчан Хөснетдинов - "Вокал”, "Чимги” төркеме егетләре (Ә.Миннебаев) "Инструменталь башкару, ансамбль»  номинацияләрендә II нче дәрәҗәдәге, "Дуслык” халык җыр ансамбле ( Мирхәйдәров) III дәрәҗәдәге диплом ияләре булдылар. Ә татар милли-мәдәни автономиясе "Милли йорт алды” номинациясе буенча I урынга чыкты.

Җүңүчеләрнең барысына да дипломнар һәм бүләкләр тапшырылды.

Традициягә кертелгән "Дуслык” күпере фестивале күңелле, төрле төсләргә күмелгән бәйрәм генә түгел, иң мөһиме – ул Төмән өлкәсендә яшәүче төрле милләтләр араында дуслык җепләрен үстерүче һәм ныгытучы бер чара булып тора.

Нәсимә ТАШБУЛАТОВА.