Әгүзү билләһи-минәш-шайтанир-раҗим. Бисмилләһир-рахманир-рахим! Мөхтәрәм дин кардәшләребез!

Төмән өлкәсе мөселманнары Диния нәзарәте Идарәсе һәм дә үз исемемнән барчагызны мөкатдәс Рамазан ае тәмамланып, Гайдел-Фитыр – Ураза бәйрәме җитүе белән ихлас котлыйм!

Ураза гаете – ул безнең өчен изге Рамазан ае белән хушлашу, аңа йомгак ясау. Ошбу айда рухыбызны савыктыру, тәкъвалыгыбызны арттыру өчен һәрберебезгә зур мөмкинлекләр бирелде. Без күп вакытыбызны Коръән укып үткәрдек, мәчетләребездә җәмәгать илә тәравих намазлары укыдык, төнге намазларда, мөбарәк Кадер кичендә Аллаһы Тәгаләдән үзебезнең һәм якыннарыбызның гөнаһ-хаталарын кичерүне сорап догалар кылдык.

Бүген без Рамазан аеның барлык сынауларын уңышлы үтәп, нәфесебезне җиңеп, рух һәм тән сәламәтлегенә ирешә алуыбызга шатланабыз. Ураза тоткан һәр мөселман рухи яктан пакъләнү, игелек һәм рәхим-шәфкать кылу мөмкинлеген алды, Аллаһы Тәгаләгә тагын да якынайды.

Аллаһы Сөбхәнәһү вә Тәгалә тоткан уразаларыбызны кабул кылып, Үз ризалыгы өчен булган гамәл-гыйбадәтләребезне дәвамлы, ә тормышыбызны тагын да бәхетлерәк, бәрәкәтлерәк итсә иде, Рамазан ае рухын тормышыбызның алдагы көннәрендә дә сакларга насыйп әйләсә иде, үзенең рәхим-шәфкатеннән ташламаса иде! Амин!

Гасырлар дәвамында башка дин кешеләре белән аңлашып яшәгән газиз дин кардәшләребез!

Исламның миһербанлык һәм игелек кебек асыл кыйммәтләрен саклап, алга таба да күпмилләтле төбәгебездә милләтләр һәм диннәр арасындагы татулыкны ныгытуга ярдәм итәрсез, бер-берегезне кайгыртып яшәрсез, дип ышанам.

Ураза бәйрәме якты өметләр, күңелләребезгә бәхет һәм мәрхәмәт нуры өстәсен, һәркайсыбызга җан җылысын, шатлык һәм муллык бүләк итсен. Дөньяларыбызга – саулык, бәхет һәм бәрәкәт телим!

Бәйрәмебез мөбарәк булсын!

Олы ихтирам һәм изге догалар белән, Төмән өлкәсе мөселманнары

Диния нәзарәте исеменнән

Галимҗан хәзрәт БИКМУЛЛИН.