Тубыл шәһәр Думасы депутатлары эшлекле очрашу белән себер-татар мәдәният үзәгендә, мәчеттә, унбишенче мәктәптә булдылар. Әлеге чарада шәһәр хакимияте башлыгы В.Мазур, шәһәрнең хакимият структуралары җитәкчеләре дә  катнаштылар. Мәдәният үзәгендә кунаклар игътибарына балаларның чыгышлары, Я.К.Зәнкиев музеена экскурсия тәкъдим ителде, үзәк җитәкчесе С.Ф.Ильясов эш юнәлешләре белән таныштырды. Очрашу вакытында шәһәр Думасы рәисе Н.П.Зольников Н.Я.Маметовага Рәхмәт хаты тапшырды. Унбишенче мәктәптә дә кунаклар укучылар чыгышларын яратып карадылар. Мәктәп музеенда Р.Кутумова җитәкчелегендә балалар экскурсия алып бардылар. Кунакларны иҗтимагый оешмаларның  эшләре дә кызыксындырды. С.З.Хисмәтуллин, директор, округ депутаты һәм шәһәр татар милли-мәдәни автономиясе рәисе дә буларак, башкарган эшләре буенча кунаклар игътибарына  экраннан видеоролик күрсәтте. Аннары "Милләтләр арасында үзара әңгәмәдә  тәрбия, мәдәният” темасына чыгышлар яңгырады. Пушкин урамындагы мәчеттә имам Ибраһим Сухов белән сөйләшкәндә, яшьләрне тәрбияләүдә әхлакый тема мөһим урын алып торырга тиешлеге турында сүз алып барылды, архитектура һәйкәле дип саналган мәчетебездә әле реконструкция эшләрен дәвам итәргә кирәклеге турында да әйтелде. Очрашулар якташларыбыз күңелләрендә яңа өметләр уятты, нәтиҗәсе уңышлы булсын иде.

Римма УМИТБАЕВА.

Г.Саитов фотосы.