Төмәннең 425 еллык туган көне бик зурдан
үткәрелде, әмма иртә белән һава торышы еламсырап торган иде, төштән соң
туктамастан яңгыр яварга тотынды. "У природы нет плохой погоды” диләр, халык
бәйрәмгә сагынган, чиләкләп яңгыр явып торса да, һичнигә карамастан чын
күңелдән ял итте. Шәһәрнең төрле почмакларында компанияләр, оешмалар, фирмалар
тарафыннан балаларга, яшьләргә, олыларга уеннар, бәйгеләр оештырылды. Төрле яктан микрофон тавышлары яңгырады.
Бөтен чараларны карап булмады, әмма берничәсен бик яратып күзәттек. Мәсәлән,
Төмәннең 400 еллык мәйданында иске модельле автомобильләрнең ярышы үткәрелде.
Аларны хуҗалары ничек кенә бизәмәгәннәр, машиналарның ниндие генә юк. Хәзерге заман
балалары иске транспортларга шаккатып карадылар. Призлы урыннар алучыларны
драма театры каршында дипломнар белән бүләкләделәр.
Үзәк универсаль кибет (ЦУМ) каршында
матур бизәлгән зур сәхнәдә Төмән, Чиләбе, Свердловск шәһәрләре артистлары
концерт куйдылар. Халык күп иде, яшь егетләр
яңгыр явуга карамастан,
курткаларын салып сәхнә каршында дәртләнеп биеделәр. Ә Төсле бульварда
"Мимикрия” театры артистлары
"ходункиларда” йөреп тамаша ясадылар, "Мегафон” челтәре уеннар оештырды, аттракционнар эшләде.
31 июльдә озак барган капиталь
ремонттан соң Төмәннең Коммуны урамында урнашкан ФК "Тюмень”("Геолог”)
стадионынының тантаналы рәвештә ачылуы
булды. Монда 10 меңгә якын халык җыелды. Стадион ифрат заманча матур эшләнгән.
Халык өчен бөтен уңайлыклар алдан каралган. Стадион кырына карап шәһәрең өчен
горурлык хисе уянды. Монда гаять зур электрон табло куелган, як-якка экраннар
беркетелгән, уен кырында нәрсә барганы якыннан күренә. Стадионны тулысынча
трибуна уратып алган. Полиция хезмәткәрләре һәр кешене җитди тикшереп, уяу
тордылар. Ачу тантанасыннан соң футбол матчын карадык. Мәскәү эстрада
артистлары җыелма командасы белән Төмән шәһәре хакимияте, өлкә хөкүмәте, спорт
ветераннары җыелма командасы ярыштылар.
Нәтиҗәдә 2:2 очко белән футбол тәмамланды.
Моннан соң Россия эстрада "йолдызларының” концерты булды. Монда "Рондо”
төркеме, Николай Трубач, Игорь Саруханов
һәм башка танылган артислар чыгыш ясадылар. "Стадионыгыз бик шәп, мәскәүлеләргә
дә көнләшерлек!”- диде Саруханов. Мондый
зур бәйрәм карап, стадионнан күтәренке
рух белән таралыштык.
Д.ФӘХРЕТДИНОВА.
|
