"ОНЫТМЫЙБЫЗ, СЕЗНЕ, АЗАТ АБЫЙ!”

 17 декабрь көнне "Этнос” балалар үзәгендә "Яңарыш” газетасын оештыручы, аның беренче мөхәррире Азат Гыйззәт улы Сәгыйтовның 70 еллык юбилее истәлегенә багышланган кичә үткәрелде.

"Яңарыш”ның 5 яшен дә, 7 яшен дә, Казаннан кунаклар килгәч тә очрашуны һәм башка чараларны монда уздырдык. Кайчан гына мөрәҗәгать итмик, үзәкнең директоры Венера Ивановна Хәйруллина һичкайчан кире какмый, хәлебезгә кереп ярдәм кулын суза.

Чарага Азат Гыйззәт улының иң якын дуслары, газета хезмәткәрләре, хәбәрчеләре килделәр. "Регион– Төмән” радиотелекомпаниясенең "Очрашулар” телетапшыруы җитәкчесе Ләйсән Хөрмәтуллина, Төмән өлкәсе буенча "Татарстан–Яңа Гасыр” телерадиокомпаниясе оператор-монтажчысы Рамил Нигъмәтуллин кичәне телевидениегә төшерделәр.

- Без газетаның ничек аякка басканын һәрчак исебездә тотабыз. Бу Азат абыйның хезмәте. Халкы өчен күрсәткән эшен без  беркайчан да онытырга тиеш түгел , - дип газетаның редакторы Алсу Мөхәммәтәмин кызы Сәгыйтова чараны ачты. Газета хезмәткәре Римма Умитбаева очрашуны алып барды.

- Азат абыйның эше һәрберебезгә гыйбрәт. Ул бөтен күңеле белән ошбу газетабыз өчен эшләде. Исемдә, 1990 еллар азагында, минем кыен гына вакытларда, корылтайлар авыр хәлдә булганда,  Талмыда мәчет түбәсен япканда яныбызга менде.

- Бик күп мәчетләр салдыгыз, ник моның турында корылтайда әйтмәдең, - дип көенеп әйтте. Ул күп проблемаларыбызны җиңеләйтә иде. Азат абыйның рухлары шат булсын. Һәммәгезгә көч-куәт телим, - дип сөйләде Җәмигъ мәчете имамы Галимҗан хәзрәт Бикмуллин.

– Азат абыйны искә алу кичәсе шушы мөхәррәм айга туры килде. Кайда гына булмасын, ул, милләттәшләребезне газетага яздыра иде, һичкем язылмый калмый иде, ул шулай җаен таба белде. Бөтен догаларыбыз ирешсен, - дип өлкә мөселман казыят идарәсе җитәкчесе Фатыйх хәзрәт Гарифуллин бәян итте.

Рәүфә Кангазина сәнгатьле итеп Азат Гыйззәт улына багышлап Ш.Маннаповның «Тузанлы олы юлларда» шигырен укыды. Экранда Азат абыйның яңа туган чагыннан  алып төрле елларда төшерелгән фотолардан презентация күрсәтелде. Аларны тетрәнмичән генә карап булмады. Аны искә алу  хөрмәтеннән бер минут тын тору игълан ителде.

- Азат белән 1979 елны Байкаловода мәктәп–интернатта директор булып эшләгәнендә таныштым. Шуннан элемтә өзелмәде. "Яңарыш”ны кулыма алган саен шатланам. 20 ел элек Азат Гыйззәт улын билгеләмәсәләр, газетаның язмышы нинди булыр иде икән. Авыр елларда көеп-янып "Әллә чыгып китим микән,” - дия иде. ”Нинди генә кыенлыклар булмасын, инде сиңа артка ходу нет”, - дия идем. Бүгенге көндә "Яңарыш”ның бөтен Россиядә билгеле булуында Азатның казанышы зур. Алга барыйк, телебезне ташламыйк. Мәгариф эшендәме, мәдәнияттәме, аларны үстерә торган "Яңарыш”ыбыз бар. Газетага озын гомер телим, рәхмәт кызларга, - дип дулкынланган тавышы белән сөйләде күренекле шәхес Әхтәм Каюмов.

- Азат абый бәйрәмнәрдә фотоаппаратын тотып үзе йөри иде. Зур-зур мәкаләләре чыкты. Аның белән сәгатьләр буе сөйләшә идек. Татарның проблемаларын күп белә иде. Шулар өчен бик борчылды. Аның белән аралашып тәҗрибә туплаганыма рәхмәтлемен. Газета бик матур чыга, абруйлы. Милләттәшләребез күбрәк язылсыннар иде, - дип өлкә татар мәдәният үзәгенең беренче җитәкчесе, концертлар оештыручы Фәрит Хәкимов бәян итте.

Төмән дәүләт университетының филология һәм журналистика институтының татар теле һәм әдәбияты бүлеге җитәкчесе, филология фәннәре докторы, профессор Хәнисә Алишина да бик матур чыгыш ясады, ул болай дип сөйләде:

- Әгәр дә Азат абый исән булса, бүген чәчәкләр алып килгән булыр идек. Хәзер Алсу Мөхәммәтәмин кызы белән "Жизнь замечательных людей” сериясеннән "Азат Сагитов. Первый редактор газеты” дигән китап чыгарырга булдык. Туксанынчы еллар башында әле гаиләм белән Казанда яши идек. Бик авыр еллар булды. Казаннан газетага хат яздым, мәкаләм икенче санында ук чыкты. Өч ел газетаны почта аша алдырып укыдым. Туган якка сагынган чакларда ул минем юанычым иде. Кызларга бик зур рәхмәт. Бу халыкка хезмәт итү. Бергә эшлик, бердәм булыйк!

Өлкә татар Конгрессы исеменнән мәдәният департаменты җитәкчесе Вәлимә Ташкалова, өлкә татарлары милли-мәдәни автономиясе исеменнән өлкә татар мәдәният методик бүлеге башлыгы Гөлфия Хәлитова чыгыш ясадылар. Алар иң җылы сүзләр белән Азат Гыйззәт улын искә алдылар.

- Берзаман, өлкәдә татар газетасы чыкканын ишетәбез. Хатыйп абыегыз беренче санын каяндыр алып та кайткан. Бик шатланып укыдык. Безгә редакциягә чакыру килде. Анда кердек. Редакциядә кеше күп иде.  Сәгыйтов кайсысы икән дип уйлыйбыз. Бервакыт, олпат гәүдәле, мөлаем йөзле, ягымлы ир чыкты. "Карагыз, яңа кешеләр дә бар икән", - ди. Азат кешелекле, зыялы, кайгыртучан, өлкәннәр янында үзен кече тота белә торган зат иде. Ул безнең күңелебездә мәңге шулай саклана, - дип хатирәләрне яңартты ветеран укытучы Люция Хәбибуллина.

- Һәр елны үзебезнең якларда 50-60 кешене "Яңарыш”ка яздырам. Ул миңа авыр түгел, киресенчә, шатлык булып тора. Хәзерге көндә телевидениедән нәрсә генә сыйдырганнар. Атыш, суеш... Нинди начар әйбер бар, барчасын күрсәтәләр. Шуларны караганнан соң йоклап булмый. Ә менә "Яңарыш” килсә, аны укып җанга бәлзәм кебек ләззәт табасың. Бөтен баш авыртулар басыла. Артык газетага язмасак та, җаныбыз белән сезнең янда яшибез, - дип үзенең фикерен белдерде ветеран укытучы Рәшидә Бакиева.

- Азат белән соңгы очрашуыбыз 2005 елның 8 март алдында булды. "Кызларга чәчәк алып бирергә дә редакциядә бер тиен акча юк”,- диде ул үкенеп. Редакциядә еш була идем. Азат үземә эндәшми генә китабымны чыгарды, - дип искә алды Азат абыйны шагыйрь Заһит Акбүләков.

- Бер вакытны яныбызга өч кеше килде. Берсе энемнән сорый: "Синме гәзиткә язасың?” Энем юк, абый яза ди. Баксаң, сораган кеше Азат Гыйззәт улы икән. Беренче танышуыбыз менә шулай булды. Газета хезмәткәрләренә барчасы өчен зур рәхмәт, - дип сөйләде Талымхан авылында яшәүче хәбәрчебез Әмир Юскаев.

Радиоспорт буенча дөнья чемпионы Зыятдин Низамов зур сагыш белән Азат абыйны искә алганнан соң, "Яңарыш” коллективына, мөхтәрәм кунакларга "Дан” орденының тулы кавалеры - якташыбыз Хәбибулла Якинның дипломын тапшырды.

"Этнос”балалар үзәге директоры Венера Хәйруллина үзәк исеменнән редакция коллективына, Люция апа белән Рәшидә апага бүләк тапшырды.

- Бүгенге көндә 3-7 яшькәчә 70кә якын бала шәһәрдә татар телен өйрәнә. Үзәктә "Әхлак” төркеме 6 ел эшләп килә. Анда балаларга дин йолаларын өйрәтәбез. "Яңарыш”хезмәткәрләренә зур рәхмәт. Эшегез авыр, интенсив эшлисез. Уңышлар сезгә, -  диде.

Кичәдә Азат Гыйззәт улының дуслары -  Тимур Нигъмәтуллин, Рәис Фазылов та булдылар.  Кунакларга, якты йөз белән үзләрендә кабул иткән "Этнос” хезмәткәрләренә зур рәхмәт белдереп, очрашуны Алсу Сәгыйтова йомгаклады. Без якташларыбызның чыгышларыннан Азат Гыйззәт улын никадәр ихтирам итүләрен, юксынуларын күрдек. Милләт улы үлемсез. Халкына күрсәткән хезмәте белән милләттәшләренең хәтерендә мәңгелек сакланачак. Без Азат Сәгыйтовны һәр елны шулай декабрь аенда искә алырбыз һәм аның батырлыгы, үткерлеге, тәвәккәллеге каршында башыбызны иярбез.

Д. ФӘХРЕТДИНОВА.