11 май көнне Төмән үзәгендәге "Төсле бульвар”да өлкә татар Конгрессының татар яшьләр берләшмәсе бөек шагыйребез Габдулла Тукайның туган көненә багышлап әзерләнә торган "Мин татарча сөйләшәм” акциясе кысаларында төмәннәр өчен матур бәйрәм оештырды.

Бу чараны үткәрү алданрак 27 нче апрельгә билгеләнгән булса да, һава торышы яңгыр вәгъдә итү сәбәпле, кичектерелде. Быел язның кыш белән саубуллашуы озакка тоткарланды, гел салкын җил, яңгыр белән үтә көннәр. Алай да ул көнне шәһәрдә үткән "Татарча солянка” проектында катнашучылар концерты тәнәфесендә тамашачыларга флешмоб күрсәттеләр яшьләр. Эстрадабыз йолдызларын тыңларга килүчеләр сокланып, куанып карадылар аларны.

Көн матур булгангамы, цирк янына быелгы чарага килүчеләр шактый иде. "Миңа яшьләрнең шулай бергәләшеп туган телләре, мәдәниятләре үсеше турында уйлаулары, бу юнәлештә үзләреннән өлеш кертүләре бик ошый. Ел саен әнием белән "Мин татарча сөйләшәм” бәйрәменә барырга тырышам. Ике малаем үсеп килә. Эмиль инде югары уку йортын тәмамлый, татар хәрәкәтендә актив катнаша. Алып баручы да, музыка куючы да ул, бии дә, халык уен коралларында уйный да. Ә кечкенәсе Тимур авылдагы театр түгәрәгенә йөри. Алар куйган күренешләр программага ямь генә өстәделәр, яшьләргә дә бик ошады. Бер яктан татар әдәбияты белән танышсалар, икенчедән татарча матур итеп сөйләшә белүче яшьтәшләре барын, аларның актив булуларын, зур эшләр башкаруларын күрделәр, - дип сөйләде Елена Камалова.

Чынлап та бәйрәм бик кызыклы оештырылган, монда берничә дистә егет-кыз бергә җыелышып флешмоб та тәкъдим иттеләр, Индрәй музееның театр түгәрәге әгъзалары әзерләгән татар әдипләре әсәрләреннән өзекләр дә һәркемгә ошады, татар биюе буенча Рамил Сәгыйтов җитәкләгән мастер-класста да теләп катнаштылар. Ә инде төрле халык уеннары татар телен, мәдәниятен белүдә осталыкларын күрсәтергә, якынрак танышырга ярдәм итте. Чибәрләр бәйгесендә катнашкан Яна Мәхмүтова, Альберт Әбдрәшитов, Рәзил Шәймәрдәнов, Илшат Әхмәтҗанов, Дамир Абдразаковның, берләшмә әгъзалары Индира Уразумбетова, Земфира Гайнетдинованың матур җырлары, Төмән татар мәдәният үзәге һәм "Гүзәл” ансамбле биючеләренең чыгышлары күпләрнең күңелләрендә, "мин дә алар арасында булырга телим” кебек теләк уятты, яшьләр берләшмәсенең җитәкчесе Сәет Тузмөхәммәтов аларны киләсе утырышларына чакырды, һәркемгә дә "Мин татарча сөйләшәм” акциясенең эмблемаларын, кыска сүзлекләр таратты. "Быелгы чара күпкә кызыклырак, отышлырак үтте, - дип бер-берсе белән сөйләштеләр тамашачылар. "Тик менә ник, матбугат чараларыннан башка, бер генә җәмәгать оешмасы вәкилләре, җитәкчеләр күренмәде соң, - дип аптырадылар кайберләре. – Әллә аларга татар теле кирәкмиме, алар да татар яшьләре алдында чыгыш ясасалар икеләтә отышлырак булыр иде түгелме?”

Гөлнур Вәлиева.