Шул уңайдан 50 мең сум премия бирелә, пенсиягә чыкканнан соң  хезмәт ветераны кебек льготалар билгеләнә. Алты ел эчендә мондый бүләккә 195 күп балалы ана лаек булды. Халыкара гаилә көнен билгеләп үтүне дәвам итеп,  18 майда Төмән өлкә хөкүмәтенең олы залында губернатор Владимир Якушев Төмән, Тубыл шәһәрләре, Төмән, Тубыл, Түбән Тәүде, Ялутор, Упорово, Сладковск, Абатск һәм башка районнарның 15 хатын-кызына "Ана даны” медален тапшырды. Алар арасында безнең милләттәшләребез дә бар. Мәсәлән, Түбән Тәүде районы, Киндерле авылыннан Нәркизия Әхмәтфәрит кызы һәм Әмир Зәкәрия улы Әхтәриевлар акыллы, эшчән бер егет һәм дүрт кыз тәрбияләп үстерделәр. Кызганычка каршы, әтиләре балаларының матур тормыш корып яшәүләрен, оныкларын туйганчы сөя алмый калды, яннарыннан киткәнгә дә инде дүрт ел тула. Шушы тантанага Нәркизия Әхмәтфәрит кызы Рания һәм Нуризә (астагы рәсемдә) исемле кызлары белән килде.

Тубыл районы, Хуҗайлан авылында 5 балалы Миршат Мөфтах улы һәм Сания Таип кызы Зәнкиевлар (өстәге рәсемдә) яши. Бүгенге көндә 15 оныклары бар. Авылдашлары арасында зур абруй казанган тырыш, хезмәт сөюче гаилә. Бу бәйрәмгә Зәнкиевлар уллары белән килгәннәр.

Төмәндә Нурзидә һәм Газинур Фәрхетдиновлар дүрт егет һәм ике кыз тәрбиялиләр. Иң олы бала – Лиана шушы бәйрәмнең шаһиты. Иң кечкенә кызлары 5 яшьлек Карина балалар бакчасына йөри. Нурзидә ханым физиотерапия буенча шәфкать туташы, тормыш иптәше Газинур электр белән эретеп ябыштыручы. Балалар ата-ана назын тоеп сәламәт тормышта үсәләр.

Медаль белән бүләкләнгән  аналарның барысын да чын күңелдән тәбриклибез.

Гаилә ул - нигез, ныгытма. Рухи һәм әхлакый кыйммәтлелек, традицияләр, ата-бабалардан килгән йолалар нәкъ менә гаиләдә тәрбияләнә.  Безнең регионда күп балалы гаиләләргә уңай шартлар тудыру өчен федераль һәм өлкә порограммалары уңышлы эшли.

Д.ФӘХРЕТДИНОВА.