Төмән районы, Турай авылында яшәүче Җәмилә Хәким кызы Шәрипованың берөзлексез совхозда, хәзерге вакытта "Ембаевский” авыл хуҗалыгы производство кооперативында тепличница булып хезмәт итүенә май аенда 30 ел тулды.

Мөлаем йөзле, тыйнак, сабыр Җәмилә Хәким кызы белән очрашып, эше турында сораштык.

Яшелчәчелекнең Тураево цехында Диләфрүз  Камалова бригадасында эшлим. Бригадада 7 кеше хезмәт итәбез. Әүвәле кыяр иде, хәзер кәбестә утыртабыз. Язын март-апрель  айларында бер күзләп тасмаларга тезәбез, аннары су сибәбез, карыйбыз. Май башында кырга утыртабыз, утыйбыз, июльнең соңгы көннәрендә иртәнге кәбестәне ала башлыйбыз. Технология хәзер заманча, тракторның артыннан калмастан яшелчәләрне төяп барабыз. Коллектив дус, түрәләр әйбәт. Оешма Калинина исемендәге совхоз иде. 90 нчы елларда 20 кеше - бөтен туганнар Гөлминур Сәитова бригадасында эшләдек, социалистик ярышларда катнашып бүләкләр алдык. Мәрхүм каенанам да Бибинур Хөснетдин кызы  озак еллар биредә эшләде, шуннан пенсиягә чыкты. Бөтен бригадага пешереп ашата иде, 9 бала тәрбияләп үстерде. Эшләгән дәвердә "Тараскуль” санаториенда ял итәргә туры килде, путевка белән Ростов, Нижний Тагил шәһәрләренә бардым. Эштән соң "Манҗыл” фольклор ансамблендә, фестивальләрдә, концертларда катнаштым,  - дип сөйләде Җәмилә Хәким кызы.

Ул Төмән районы, Кыштырлы авылында туган. Кыштунлы башлангыч мәктәпне тәмамлаганнан соң, 5-8 сыйныфларны Княжево мәктәбендә укый. Төмәнгә килгәч пешекче һөнәренә ия була. Шәриповлар гаиләсенә 16 яшеннән килен булып килә. Турай егете Фәйзулла Фәйзелхан улы белән тормыш коруларына 36 нчы ел. Кыз һәм ул тәрбиялиләр, 4 оныклары бар. Уллары гаиләсе белән авылда, кызлары Мегион шәһәрендә яши. Фәйзулла Фәйзелхан улы озак еллар совхозда тракторчы булып эшли, бүгенге көндә мәдәният йортында шофер вазифасын үти. Татар җәмәгать тормышында кайный - Сабантуйларда,  төрле бәйрәмнәрдә катнаша. Җәмилә ханым моңлы тавышы белән җырлый. Гади, тырыш, аш-суга оста, кешелекле киленнәрен  Шәриповлар бик яраталар, барысы да рәхмәтләрен белдерәләр. Хатын-кыз өчен иң зур бәхет – ирең белән тигез тормыш итү, тигез канат белән үстергән балаларыңның бәхетен күреп сөенү. Хезмәт кешесенә - хөрмәт.

Җәмилә Хәким кызы  намуслы эше өчен 2009 елда һөнәри союзларның өлкә советы; 2011 елда Төмән районы хакимияте башлыгы В.Н. Гультяевның Мактау грамоталарына лаек була. Авыл хуҗалыгы хезмәте иң авырларның берсе. Тирә-якта үзләрен сынатмыйча шушындый эш сөюче милләттәшләр яшәвенә куанасың, алар белән ихлас күңелдән горурланасың.

Д.ФӘХРЕТДИНОВА.