Үткән якшәмбедә Төмән шәһәренең "Төзүче” милләтләр мәдәнияте йортында татар бүлеге мөдире Гөлфия Хәлитова җитәкчелегендә Әниләр көненә туры китереп "Иң кадерле кешебезгә!” дип исемләнгән концерт булып үтте. Бәйрәм кичәсен Гөлфия Нариман кызы туган телебездә матур шигъри юллар белән башлап җибәрде. Шул арада сәхнәгә нәни баласын җитәкләгән ана килеп чыгып, бәбкәсен сөя-иркәли алга үтте, алар артыннан мәктәп яшендәге улын сыйпый-сыйпый, җил-яңгырдан саклаучы ана, аннары ир-ат булып җиткән улын армия сафына озатучы ана образы пәйда булды. Ананың бала тормышында алыштыргысыз роль уйнавын күрсәткәннән соң, алып баручы: "Җирдә бәхет булсын өчен - әни кирәк” дигән нәтиҗә ясады. Шул арада егетләр залда утыручы әниләренә роза чәчәге бәйләмнәре бүләк иттеләр. Сәхнәгә ачык, моңлы тавышлы җырчы Чулпан Акъярлы чыгып, тамашачылар күңелен дулкынландырып, әниләр турында моңсу җыр башкарды. Уйларга чумган халыкның кәефен "Гүзәл” (җитәкчесе Н.Аксанова) яшьләр бию ансамбленең дәртле биюләре ачып җибәрде. Аларга уен-коралларында оста уйнаучы Әбүзәр Миннебаев "Мөкәррәмә” җыры белән кушылып, залдагыларны дәррәү китерде. Җирле шагыйрә Клара Кучковская бүләккә алып килгән шигырьләрен укып, "Инә хакы” дигән мөнәҗәт һәм фольклорчы Ә.Патршина репертуарыннан шаян такмак-җыр башкарды. Халык "Яшь буын” өлкә татар яшьләре оешмасы җитәкчесе Фәрит Кормановның моңлы җырларын, Яркәү районының яшь, өметле йолдызы – көчле, көр тавышлы Эрик Абдуллинның, казах кызы Венера Даудованың чыгышларын да хуш күреп тыңладылар. Бәйрәм концерты оешкан рәвештә, җылы атмосферада барды. Һәр чыгыш кемнеңдер хезмәтенә тамга куяр өчен түгел, ә изге теләк - тамашачыга бары тик яхшы эмоцияләр бүләк итү максаты белән башкарылды. Гомумән, Г.Хәлитова оештырган чаралардан күңелләр чистарып, ял итеп чыгасың. Чөнки ул, яшь булуына карамастан, олысы-кечесе белән уртак тел табып, һәр шәхескә хөрмәт белән карап аралаша, эчкерсезлеге, әдәплелеге белән үзенә ихтирам яулый белә. Гөлфия Нариман кызының киләчәге якты булсын, уңышларга бизәлсен.