Төмән дәүләт университетында студентларның 61 нче фәнни конференцияләре үтте. Андагы 230 секциянең өчесен татар бүлеге мөгаллимнәре җитәкләде. Миңа яшь, өметле галимә Гөлнара Наил кызы Ниязова җитәкчелегендәге "Төрки лексикологиясенең актуаль проблемалары” секциясендә жюрида утырырга насыйп булды. Монда 12 доклад укылды. Төрле курс студентлары белән бергә Ялутор районы, Атьял мәктәбенең 9 нчы класс укучысы фәнни эшен тәкъдим итте. Темалар бик кызыклы, эчтәлекле иде, һәркайсы ныклап әзерләнгән. Югары урыннар яулаган Алсу Аширбакиеваның Ваңгы (Новая Нерда) авылының топонимиясен, Руслан Әминовның Бурбар авылында яшәүчеләрнең исем-кушаматларын, Лилия Мадъярованың татар телендә һәм себер татарлары диалектларында камыр ашлары исемнәрен, Луиза Бакиеваның Б.Сөләйманов поэзиясендәге сурәтләү чараларын, Әлфинур Рәхимованың җирле диалекттагы фитотерминнарны җентекләп эзләп, фәнни тикшереп, берничә төрки телдә чагыштырып, мисаллар китереп, кайберләренең стенд та әзерләп килүләре уңышлы, нәтиҗәле булды. Аларга дипломнар, калганнарына бүләкләр тапшырды Гөлнара Наил кызы. Жюри әгъзалары - билгеле адвокат Фәүзия Марганова һәм аспирантурада белем алучы Гүзәл Фәйзуллина чыгышларга тирән анализ биреп, үз фикерләрен белдерделәр, уңышлар теләделәр, себер татарлары тарихын, тюркологиясен өйрәнүче яшьләр үсүенә шатлануларын җиткерделәр.

Г.ВӘЛИЕВА.