Тубыл шәһәрендә  "Дуслык такыясы”  балалар фестивале үтте. Анда   барлыгы 260 бала катнашты. Чараны оештыручы Әлфия Әхтәм кызы Петухова: ”Мондый бәйрәмнәр милли-мәдәни традицияләрне үстерә, балаларда толерантлык хисләрен тәрбияли. Фестивальнең даны үсә - шунысы сөендерә. Катнашырга теләүчеләрнең саны да арта”, - диде. Ике көн дәвамында барган фестивальдә вокал буенча беренче  урын 14 нче мәктәп укучысы Татьяна Плотниковага бирелде (җитәкчесе Ирина Рудковская), сәнгатьле уку номинациясендә беренче урынга Чулпан Сәйфуллина, Илнар Колмәмәтов лаек булдылар (Гүзәл Колмәмәтова),  музыка коралларында оста  милли көйләр башкаручы Радмир Хучашев булды (Анатолий Березин, Наилә Шакирова ). Тамашачылар шәһәр мәктәпләрендә бию сәнгатенә күбрәк игътибар бирелүен  күзәттеләр. Көчле хореографлар  Мөнәвәрә Андрущик, Светлана Исаева, Равилә Мухаряпова, Наталия Балицкая   җитәкчелегендә ансамбльләр  призлы урыннарга лаек булдылар. Фестиваль оешкан рәвештә саллы үтте. Бәйрәмдә катнашучы һәр бала диплом һәм кыйммәтле призлар белән бүләкләнде. Әлеге бәйге  Тубыл шәһәрендә өченче мәртәбә үткәрелде. Оештыручылар, катнашучылар «Дуслык такыясы» ның озын гомерле булуына  ышаныч  белдерәләр.

Р.УМИТБАЕВА.