Төмән өлкәсенең 21 ел тарихлы бербәнбер татар газетасын - "Яңарыш” ны беренче көннән үк җитәкләгән, ныклап аякка бастырган, аның өчен бар күңеле-йөрәге белән борчылган, гомерен дә жәлләмәгән Азат Гыйззәт улы Сәгыйтов вакытсыз арабыздан киткәнгә бүген җиде ел булды. Ул башкарган изге эшләр халкыбыз хәтерендә мәңге саклана. Аның истәлеге итеп гомеренең соңгы көннәрендә язган бер шигырен тәкъдим итәбез:

Ялан аяк йөргән урамнарым

Һаман баткак икән, тузанлы.

Әллә инде заман яңарышы

Сине читтән урап узганмы?

Кайда айлы булган мәчетләрең,

Йортларны да зурдан корганнар.

Кая барсам, ят кешеләр очрый,

Калмаганнар якын туганнар.

Кабат-кабат уздым урамыңнан,

Беркем исемем белән дәшмәде.

Кордашларым күптән китеп барган,

Мине танымыйлар яшьләре.

Ата-бабамнарның нигезендә

Таныш түгел йортлар утыра.

Сабый чакта түккән күз яшемдәй,

Урамында җыелып су тора.

А.Гыйззәт.