"ЯҢАРЫШ”КА

"Яңарыш”ны яратам!

Уй – фикерләр яңартам:

Милләт артта калмасын, дип

Яңалыклар тарата.

Бүген әйтәсе сүзем шул:

Егет яшендә үзең;

Бабай акыллары белән

Бик күпне күрә күзең.

"Яңарыш”, синең күгеңдә

Күп йолдызлар күренә,

Яктыларын элеп куясың

Иҗат күге түренә.

Улларыңа, кызларыңа

Син бирәсең кулларың;

Уңышлардан уңышларга

Илтсен сине юлларың.

Имансызга иман иңә,

Бәхетсезгә - бәхетләр;

Милләтеңне күтәрәсең,

Биек булсын тәхетләр.

"Яңарыш”та тормыш кайный

Яшәү ярларын кагып;

Кайчакта гыйбрәт аласың

Ялгышка хәйран калып.

Мәкаләләрнең кайсында

Аксакал акыллары;

Гасырлар буе тупланган

Тәҗрибә хаклыклары.

Иман сүзе - дога белән

Күңелне агартасың.

Мәслихәтең өмет бирә,

Хисләрне яңартасың.

"Яңарыш”, алга дәшәсең,

Яныңда мин, янәшә;

Көч өстисең, ял бирәсең,

Куандырып, мең яшә!

  Исәнмесез, хөрмәтле "Яңарыш”лылар!

Менә сезнең туган көнегез дә җитте. Рәхмәт сабырлылар, тырышлар, уңганнар! Барыгызны да тәбрик итеп, сезгә исәнлек-саулык-тазалык, иҗади уңышлар, гаилә иминлеге теләп калам. Хәләл җефетләрегез, улларыгыз, кызларыгыз, оныкларыгыз белән фанинең рәхәтен күреп яшәгез. Иҗат җимешләрегезнең рәхәтен, тәмен-ямен күреп озак-озак бәхетле гомер кичерегез.

Изге теләкләр белән Зилә апагыз.