Хезмәтенә зур җаваплылык белән караганга һәм дә тырышлыгы, эшчәнлеге, кешегә ихтирамлы булуы белән авылдашлары арасында олы хөрмәт яулаган. Ул пешергән тәмле ризыклардан авыз иткәннән соң, аш-су остасы белән якыннан танышырга булдык. Ул әле безне авыл хатыннарына гына хас булган тыйнаклыгы, сабыр булуы белән дә  сокландырды. Мәрвәр апа эше авыр булуына карамастан, хезмәтен бик теләп башкара: «Беркайчан да тынып тормаган шау-шу арасында, еллар үтүе сизелми,  үзеңне гел яшь итеп тоясың”, - дип елмая ул. Апа эшкә иртәнге сәгать сигезенче яртыда килә, утын, су ташый, мич яга. Зур тәнәфескә хәтле 38 укучы һәм укытучыларга аш әзерләп өлгерә, ашатып алгач табак-савытларны, идәннәрне юа. Безне кызыксындырган сорауларга Мәрвәр апа:”Ашханәгә азык-төлек Түбән Тәүде РайПОсыннан килә, җәен самолет белән китерәләр. Владимир Александрович Кудеев бик җаваплы кеше, балаларның сәламәтлеге өчен нинди ризык кирәк, шуның белән безне  тәэмин итәргә тырыша, рәхмәт аңа», - дип сөйләде. 

     Мәрвәр апаның бала чагы авыр булган. Әнисе үлгәндә 17 яшьтә кала, туганнары ятим калган 7 баланы балалар йортына җибәрмәс өчен, Мәрвәр апага 18 яшь дип яздырып, аны 5 балага опекун итеп куялар. Бер сеңелләрен генә апалары Сумкино балалар йортына алып китә. Менә шулай аңа үзен генә түгел, эне-сеңелләрен дә аякка бастыру турында кайгыртырга туры килә. Ул озак еллар китапханәче булып эшли. Тормыш иптәше белән 3 бала тәрбияләп үстерәләр. Бүгенге көндә уллары Марат Төмән шәһәрендә милиция хезмәткәре булып эшли. Кызлары Сабина 11 нче сыйныфны тәмамлап, Төмәндә колледжда укып йөри. Кызлары Рафия әти-әнисе янында яши.

Р.КАНГАЗИНА.