Әминә Мөхәммәтҗан кызы Ташбулатованың Тубыл районы Күкрәнде, Ләчек
авылларына почта ташуына да февраль аена 20 ел була икән. Ул 42 ел стаж белән 6
ел элек лаеклы ялга чыккан булса да, өйрәнгән эшен дәвам иттерә. Әминә апа
почтаны Кутарбитка үзәк почта бүлегеннән барып ала. Алдагы елларда транспортны
үзе эзләп табып йөрткән булса, күптән түгел кулланырга «Буран», җәен күлләр аша
йөрер өчен, моторлы көймә бирелгән. Төп эшеннән башка ул сәүдә бүлеге
тауарларын сата, халыктан ай саен электр утын кулланган өчен түләнмәне җыя,
страховать итү эшен дә башкара. Һәр йортта Әминә апаны көтеп алалар, чөнки ул
үзе белән яхшы хәбәрләр генә түгел, матди иминлек тә китерә. "Эшебез бик
җаваплы, бигрәк тә пенсия акчасын өләшкән вакытта борчылырга туры килә. Акча
белән эш иткәч, төрле хәвефле хәлләрдән куркып торасың. Әмма, халык бездә
намуслы, шуңа ямьсез хәлләрнең, шөкер, булганы юк. "Яңарыш” газетасын үткән ел
47 кеше яздырган булса, бу юлы 58 кеше язылды, аларның 16сы – ләчеклеләр. Елның
беренче ярты еллыгында күбрәк язылалар, чөнки халык кышын балык, ит, мүк җиләге
сатып акча булдыра, ә икенче яртыеллыгында күбрәк пенсионерлар гына язылалар”,
- дип сөйләде.
Р.КАНГАЗИНА.
|