Яшьләрнең җәмәгать эшләрендә актив катнашулары, дингә тартылып, ата-бабаларыбыздан килгән йолаларны хөрмәтләп, сәламәт гаилә төзергә омтылулары, өстәвенә хәйрия эшләре белән дә шөгыльләнүләре аеруча шатландыра. Үткән җомгада "Төзүче” милләтләр мәдәнияте йортында татар бүлеге җитәкчесе Гөлфия Хәлитова җитәкчелегендә өлкә яшьләре изге ният белән бик матур концерт оештырдылар. Чараның максаты – җыелган акчаны Богандинка поселогында яңа төзелә торган мәчетнең исәп-хисап счетына күчерү иде. Бу идеяне яшьләр лидеры Руслан Мамеев тәкъдим иткән, аның теләген хуплап Гөлфия Нариман кызы бу эшкә өлкә татар яшьләре союзы (җитәкчесе З. Бәдретдинова) белән берлектә милләтләр мәдәнияте йортында эшләүче мөселман яшьләрен дә тарткан. Тамаша Коръән сүзләре белән башланды, изге эшкә Төмән өлкәсе казыяты казые Фатыйх хәзрәт Гарифуллин фатыйхасын биреп, кунакларга вәгазь сөйләде. Аннары сәхнәгә чараны алып баручы Земфира Шәрипова белән Сәет Тусмөхәммәтов чыгып тамашада катнашучылар белән таныштырдылар. Концерт чынлап та искиткеч матур булды, казах, азербайҗан, кыргыз кызлары һәм егетләренең моңлы тавышлары, оста биюләре, үзебезнең танылган җырчыларыбыз Руслан белән Рөстәм Маметовлар, Яркәү районы, Сорокино мәктәбенең 10 нчы сыйныф укучысы Эрик Абдуллин, Ринат Әхтәриевнең чыгышлары онытылмаслык мизгел бүләк итеп, яшәү дәрте өстәделәр. Кызганычка каршы, тамашачылар саны бик аз булды. Бу турыда Г.Хәлитова ачынып: «Белдерүне "Яңарыш” газетасы, "Татар радиосы” тапшыруы һәм яшьләр сайтында бирдек. Мондый чараны беренчегә оештыруыбыз, киләчәктә инде ешрак үткәрергә исәп. Безнең бу ниятебезне хакимият башлыклары да күреп, ярдәм кулы сузсыннар иде. Форсаттан файдаланып, яшьләребез исеменнән "Төзүче” милләтләр мәдәнияте йорты җитәкчесе В.В.Швец һәм аның урынбасары Л.Ф.Лосьевага концерт уздырырга бинаны бушлай биргәннәре өчен зур рәхмәтебезне белдерәбез”, - диде. Халык әлеге чарадан рухи канәгатьлек кичереп, яшьләргә чын күңелдән уңышлар теләп таралды.

Р.КАНГАЗИНА.