Күптән түгел редакциягә Нәҗип Алиулла улы Абайдуллин белән Хатыйп Абидулла улы Маметов керделәр. Нәҗип абый 24 февраль көнне Яркәү районы, Яңа Кәешкүл урта мәктәбендә Ватанны саклаучылар көненә багышланган чарада булган. Ул газета аша мәктәп укытучыларына рәхмәтен белдерергә килгән.

– Белем йортының спорт залында хәрби эш һәм физкультура укытучысы Мирхәт Аббас улы Абдразаков җитәкчелегендә 5-11 сыйныф  укучыларына хәрби әзерлек буенча смотр үткәрелде.  Ул миңа бик нык тәэсир итте. Армиядә мин үзем дә булган, мондыйны күреп исем китте. Балаларның барысы да хәрби формада. Аларга званиеләр дә бирелә икән. Армиягәчә ир балаларыбыз хәрби әзерлек белән танышып куялар. Строй белән атлау, мылтыктан ату, аны сүтеп киредән кору һәм башкасын бик оста башкаралар. Бу Сала  мәктәбендә  укучыларның тәртипле, тәүфыйклы, акыллы  булулары әллә кайдан күренә. Мәктәп директоры Рәсимә Рябиковага, укытучылар – Альбина Рамазановага, Хаҗия Абдуллинага, Галия Абайдуллинага һәм Мирхәт Аббас улына укучыларны патриотик рухта тәрбияләүләре өчен рәхмәтемне белдерәм. Нәҗип Алиулла улына Хатыйп Абидулла улы да кушылды.

– Үзем Ишмәт авылында туып үстем, Тараскүлдә яшим. Хәзерге балаларга телевизор нык йогынты ясый. Анда бер рәтле әйбер күрсәтмиләр. Гел атыш, суеш, үтереш. Яшь буын андыйны карап нәрсә өйрәнсен. Шәһәрләрдә яшьләр арасында наркоманлык, эчкечелек чәчәк атуы борчый. Барчасына да шул телевизор, Интернет йогынты ясый.

Хәзерге вакытта армиядән курыкмаска кирәк. Ватанны саклау - ул изге бурыч. Балаларыбызны да шул хистә тәрбиялик, - дип сөйләде ул.

Д.ФӘХРЕТДИНОВА.