Соңгы вакытта өлкә йолдызчыкларыбыз арасында Эрик Абдуллин исеме еш кабатлануы кемгә дә сер түгел. Тамашачы аны Салаватныкы кебек хөр, моңлы тавышы өчен ярата. Ә менә Эрикның үзе кебек матур тавышлы сеңлесе барын, әлегә күпләр белмиләрдер дә. Янага февраль аенда 9 яшь тулды, ул Сорокино урта мәктәбенең 3 сыйныфында белем ала. Шунысы сөенечле, рус авылында яшәсә дә, ул саф себер татар телендә сөйләшә. Ничек ул алай, дип гаҗәпләнмәгез, чөнки Абдуллиннар гаиләсендә тәрбия бары тик туган телебез, мәдәниятебез, тарихыбыз, гореф-гадәтләребезне хөрмәт итүдән башлана. Татар моңына гашыйк булуын, әбисе белән бабасыннан күчкән, дип әйтә Яна. Гаиләдә 6 бала, алар барысы да җырга сәләтлеләр. Яна тәртипле, тырыш, эшчән кыз, әнисенең зур ярдәмчесе. Мәктәптә дә яхшы укый, үткәрелгән чараларда бик теләп катнаша. Күптән түгел "Таң йолдызы” район конкурсында җиңеп, өлкә үзәгенә гала-концертка килү бәхетенә иреште. Әмма Яна җырчы булу турында хыялланмый, чөнки хәзердән ук ул тормышка аек карый. Аныңча, себердә җырлап кына матди иминлек булдырып булмый. Әлегә ул теш врачы булырга уйлый - әтисе шулай кушканы өчен. Нинди генә һөнәр сайламасын, Яна барыбер җырлавын ташламый, якыннарын һәрвакыт үзенең елдан-ел моңлана барган тавышы белән матур җырлар башкарып, сөендереп торачак икән. Якты хыялларың дөньяга ашсын, милләтебез горурлыгы булырга язсын иде.

Р.КАНГАЗИНА.