Балалар, рәсемдәге бу ике сөйкемле кызлар белән танышасыгыз килсә, хат язып, яки салкыннар җитеп, кышкы юллар төшкәч кенә теләгегезгә ирешә алачаксыз. Мөгаен, җәен самолетта очып барып күрешеп кайтырга була, ләкин барып җиткәнче, күпме нервыларыгызны бетерергә туры киләчәк. Телефон аша, дисезме? Юк, шул, булмый, чөнки телефонны аларга әти-әниләре 4 нче сыйныфны тәмамлагач кына бүләк итәбез, дип кырт кискәннәр. Гаять, ул телефонны хәзер алудан файда да юк, барыбер, авылда элемтә тотмый, дөресе, махсус антена куеп кына сөйләшеп була. Тик кесәгә тыгып, сыйныфташларга күрсәтеп мактанып йөрер өчен дисәгез генә инде. Ә-й-й, бүген мактанырсың, ә икенче көнгә ук аның яңа моделе барлыкка килеп чыгачак. Шуңа Әлфия белән Ләйлә кәефләрен кырмыйча гына, "4” һәм "5” билгеләренә генә укуларын дәвам итәләр. Кайсы мәктәптә, дисезме? Әлбәттә, Вагай районы, Агытбаш башлангыч урта мәктәбенең 4 нче сыйныфында, укытучылары Мөхлисә Боһар кызы Бәшировада белем алалар. Алар икесе дә рәсем ясау белән мавыгалар, матур җырлыйлар, оста шигырь сөйлиләр, зурайгач укытучы булу турында хыялланалар. Әлфия Садыйкованың телефон алудан башка ноутбуклы да буласы килә икән. Гаиләдә 10 бала булгач, абый-апалары ярдәменә ышана, күрәсең. Ә менә Ләйлә Асадуллина шигырьләр яза. Әйтергә онытканмын, 5 нче сыйныфка укырга алар Усак урта мәктәбенә барачаклар. Өйдәге хәлләрне белеп торыр өчен кәрәзле телефон, һичшиксез, кирәк булачак аларга.

Р.КАНГАЗИНА.