ӘКИЯТТӘН ТӨШКӘН ПРИНЦЕССА

Рәсемдәге кызчык белән без "Яңарыш” газетасының юбилеенда таныштык. Ул безгә Төмән районы, Аманат авылыннан бүләккә бик матур җыр алып килгән иде. Әкияттәге кечкенә принцессаны хәтерләткән сөйкемле бу кыз - Лилия Сыяутдинова була. Аның белән танышкач, күпкырлы талант иясе икәнен күреп чын күңелдән сокланасың. Ул 4 нче сыйныфта "4” һәм "5” билгеләренә генә укый. Сәхнәдә 6 яшеннән җырлый, гармун, аккордеонда уйный. Аның рәсемнәр альбомын актара башласаң, яраткан мультфильмнар сериалын карагандай буласың. Аларны ул сурәттән күчереп түгел, хәтеренә сеңдергәннәренә таянып ясый. Лилия үзен бик бәхетле дип саный, чөнки аның һәрьяктан да үрнәк булган, яраткан апасы - Гүзәл бар. Чынлап та, апа белән сеңел арасындагы дуслыкка сокланмаслык түгел. Гүзәл әти-әнисе биргән тәрбияне, табигать бүләк иткән сәләтне түкми-чәчми Лилиягә җиткерә. "Аның үзенең кешене үзенә тарта торган көче бар. Кая гына барма, һәркем аңа игътибар итә, җырлатып, я шигырь сөйләтеп конфет-шоколад тоттыралар, кайберәүләр, болай гына, башыннан сыйпап үтәләр”, - ди ул. Апа кеше үзе бүгенге көндә Төмән шәһәрендә белем ала, "Яшь буын” өлкә татар яшьләре оешмасына йөри, концертларда катнаша. Ул үзе дә бик матур җырлый, Лилияне  сәхнәгә ияләштерер өчен башта үзе белән бергә җырлатты ул. Ә хәзер инде апасы ярдәме белән нәни җырчыбыз тамашачылар каршында үзен һавада очкан карлыгач кебек хис итә. Лилия урта мәктәпне тәмамлагач, Казан шәһәрендә музыка буенча белем алып, профессиональ җырчы булу турында хыяллана. Ә якындагы хыялы - суда йөзәргә өйрәнү икән. Якты уйлы кечкенә принцессабызның гомер юлы озын, аллы-гөлле чәчкәләргә бизәлгән булсын иде.

Р.КАНГАЗИНА.