Спорт һәм цирк номерлары кергән чыгыш "Татар егете-2010” конкурсын тамаша кылган һәркемдә соклану хисләре уятты: нинди көчле, нык безнең егетләр! Ерактагы Карагай авылында үскән Рәсүлдә спортка мәхәббәт каян килә соң? Сорауга җавап бирер өчен аның гаилә тамырларын белү дә җитә икән. Үз вакытында физик культура факультетында белем алган, Әлмөхәммәт Хәбибуллин секциясендә авыр атлетика белән шөгыльләнгән әтисе юлыннан туры атлый Рәсүл. Яшьтән үк спорт һәм сәнгать сөюче гаиләдә һәрьяклап чыныгып үскән, шаян, тырыш, үз максатына ирешүчән егет шактый гына җиңүләр дә яулаган инде. Төмән өлкәсендә чемпион булып саналуы, Россия күләмендәге ярышларда уңышлы чыгыш ясавы аның өметле спортчы булуы турында сөйли. "Егет кеше бернинди сынауларда да югалып калмаска тиеш, төрле яктан үсәргә омтылам мин”, - дигән Тубыл социаль-педагогия академиясе 2 курс студенты Рәсүл Байморатов сүзләре шәләй-вәләй вакыт үткәреп йөрүче яшьләргә дә үрнәк булсын иде.

Г.ВӘЛИЕВА.