Сентябрь аенда Төмән дәүләт университеты каршында оештырылган "Әмәл” яшьләр иҗат студиясе Ялта шәһәрендә үткән ”Көнчыгыш базары” халыкара телевизион-эстрада фестивалендә катнашып кайтты. Сәфәрләре турында тулы мәгълүматны иҗат студия җитәкчесе Максим Александр улы Сагидуллиннан алдык. "Фестиваль югары дәрәҗәдә оештырылып, Бельгия, Чехия, Италия, Төркия, Грузия һәм бик күп башка илләрдән килгән профессиональ эстрада җырчылары ярыштылар. Концерт А.Пугачева, С.Ротару кебек танылган җырчылар чыгыш ясый торган Юбилей концертлар залында үтте. Төркиягә туры эфир булдырылып, фестиваль барышын 70 миллион халык күзәтте. Конкурс таләпләре буенча ике җыр алып бардык, берсе - җирле шагыйрь Булат Сөләйманов сүзләренә композитор-җырчы Хәсән белән Хөсәен Арангуловлар көен язган "Себер Гимны”, ә икенчесе - себер татар халкының "Алмагацның алына” дигән җыр булды. Аларны Зөлфия Речапова белән Салават Сабиров җырладылар. Форсаттан файдаланып, "Себер Гимны” җырының фонограммасын безгә бүләк иткән Арангуловларга рәхмәтебезне белдерәбез. Безгә, әлбәттә, профессиональ җырчылар белән ярышасы авыр булды. Әмма төп максатыбыз - себер татарларының телен, мәдәниятен киң дөньяга таныттыру иде, шул ниятебезне үтәп, ял итеп, кешеләр белән аралашып кайтуыбызга бик канәгать без”, - дип сөйләде ул. "Әмәл” иҗат студиясенә беркайчан да күңел төшенкелегенә бирелмичә, халкыбыз җәүһәрләрен тамашачыга батыр җиткереп, югары үрләр яуласын дигән теләктә калабыз.

Р.КАНГАЗИНА.