Студентлар көнен истә калырлык итеп билгеләп үтү максаты белән "Яшь буын” өлкә яшьләре оешмасы Төмән яшьләрен Метелево поселогының "Партиком” спорт сараена "Татарлар бозда шуалар” дигән чарага җыйдылар. Уздырылу вакыты төнге 12 сәгатькә билгеләнүгә карамастан, боз аренасы ишек янына спорт киемнәрендә олы яшьтәге апа-абыйлар да килеп бастылар. Тимераякта оста шуучылар боз өстенә шикләнмичә ашкындылар. Арада бөтенләй шуып карамаганнар да күренде, әмма биредә урнашып өлгергән күңелле атмосфера аларга икеләнергә юл куймады. Тиз арада беренче адымнар ясарга өйрәтүче остазлар да табылды. Чараны оешма җитәкчесе Фәрит Корманов ачты, барысына күңелле ял теләп, килгән кунаклар белән таныштырды. Омск шәһәренең "Алмаз” яшьләр оешмасы әгъзасы Алинә Ниязова алып баручы вазифасын үз җилкәсенә алып, төрле кызыклы уеннар, бәйгеләр оештырды. Лотерея уены бик тә кызыклы үтте, отучыларга бик күп кыйммәтле призлар эләкте. Первоуральск шәһәреннән килгән "Ватан” яшьләр оешмасы әгъзасы Денис Кротов дәртле татар җырлары башкарганда, тимераякта шуучылар түзеп тора алмыйча, бер түгәрәккә җыелып, биеп тә алдылар. Ф.Корманов әйтүе буенча, мондый чаралар татар яшьләребезне таныштыра, дуслаштыра, берләштерә һәм дә катнаш гаиләләр булдырмауга этәргеч ясый. Киләчәктә шундый файдалы очрашуларны ешрак оештырырга ниятли ул. Әлеге чарадан без дә, редакция хезмәткәрләре, чын мәгънәсендә ял итеп, ләззәтләнеп, дәрт алып кайттык.

Р.КАНГАЗИНА.