Гашыйклар көненә багышлап "Яшь буын” өлкә татар яшьләре  "Татарлар бозда шуа” дигән бик тә күңелле чара оештырдылар.   Тимераякларда шуарга дип яшьләр парланышып, күтәренке кәеф белән кичке 10да Төмән шәһәренең "Прогресс”  боз сараена җыелдылар.  Кичә барышында яшьләр бер-берсе белән танышсыннар өчен каршы алучылар килүче егетләргә номерланган зәңгәр, ә кызларга кызыл төстәге йөрәк сурәтләре өләштеләр. Бина эчендә татар музыкасы яңгырады, программаны Алина Ниязова алып барды. Яшьләр тимераяклар киеп, бозда шудылар. Арада бик оста шуучылары, бозга беренче мәртәбә чыгып басучылары да булды. Әлбәттә, читтән кызыгып күзәтеп торучылары да табылды. Алина төрле уеннар, бәйгеләр оештырды, җиңүчеләргә бүләкләр тапшырды. Иң зур бүләк – "Лэтуаль” парфюмерияләр кибете тәкъдим иткән кыйммәтле хушбуйлар иде. Ә үз парларын тапкан 8 пар арасыннан тамашачылар иң "супер”ы дип исәпләгән егет белән кызга "Ватрушкин” кафесына чакыру билеты бүләк иттеләр. Сишәмбе көн булуга карамастан, яшьләр төнге бергә хәтле күңел ачтылар. Шунысына игътибар иттек: яшьләр арасында исерткеч эчемлек эчеп, үзләрен ямьсез тотучылар бөтенләй күренмәде. Бары тик икенче көнне дәрескә, эшкә соңга калмаган булсалар гына инде...

Р.КАНГАЗИНА.