Мәктәптә дә гел бишлегә генә укыган кыз биредә дә алдынгылар рәтендә, аның рәсеме Мактау тактасында. Лениза шәһәрдә танылган музыка остасы А.Н.Кудряшов җитәкләгән уен-кораллар төркемендә уйный. Җәйге кичләрен алар тубыллыларга вальс, танго, халык көйләрен башкаралар. Яшьләр бу талантлы кыз җитәкчелегендә оештырылган "SmiIIerS” рок җырлаучылар,   "На пол-пути”   поп-рок төркеме башкарган җырларны да яхшы беләләр. 6-7 яшендә татар телендә аның башкаруында "Песи төш күрә”, "Гөлләрем”  җырларын тыңлаучылар әле дә искә алалар. Сәнгатьле итеп шигырь дә сөйләүче кызның уңышлары сөендерерлек иде. Ул әле бүген дә укытучыларын онытмый, туган телдә сөйләшә. Әллә инде милләт җанлы яшь талантның күңелендә милли бәйрәм күренешләре, балалар өчен оештырылган иҗат бәйгеләре тәэсир калдырган? Лениза сайлаган һөнәре, киләчәккә планнары белән уртаклашты. Ул: "Беренче ел авыр булды. Һәр әни-әти баласына югары белем бирергә тырыша. Мин аны аңласам да,  мөмкинлегем булса да, колледжны сайладым. Музыка бүлегендә флейтада уйнарга өйрәнү, көйләр уйлап табу - минем төп һөнәрем. Флейта гади корал булып күренсә дә, аның моңы күңелләрне җилкендерә. Замана җырларын башкаруыбыз, иҗади яңа төркемнәрнең барлыкка килүе тормышыбызга яңалыклар, үзгәрешләр кертә. Киләчәктә мин колледжда белем алып, консерваториядә укуымны дәвам итәргә планнаштырам”, - дип  сөйләде. Ленизаның флейтада уйнап "Яшьлеккә сәяхәт” ансамблендә катнашуын карап, безнең шәһәр яшьләре әби-бабайлардан күчкән җыр-моңнарыбызны онытмыйлар, дигән фикергә килдем. Иҗади эш, сәхнә  үзенә тартып тора. Ленизаның  әбисе белән бабасы ветеран укытучылар - Мәхмүдә апа белән Мансур абый Әминовлар. Гитара, флейтада бик оста уйнаучы йолдызыбыз Ленизага, аның иҗатташ иптәшләренә рухи  ихтыяҗларын, иҗади сәләтләрен үстерергә ярдәм итүче укытучылар табылып торсын дип уңышлар телисе кала.

Римма УМИТБАЕВА.