Якшәмбе көнне Төмән шәһәренең "Төзүче” милләтләр мәдәнияте йортында татар бүлеге һәм өлкә татар яшьләре Союзы тырышлыгы белән "Өчпочмак бәйрәме” дип аталган күңел ачу чарасы узды. Бәйрәмне алып баручы Земфира Шәрипова белән Айдар Кангазин милли ашлар турында сүз алып бардылар, тамашачыларның кәефләрен күтәреп мәкальләр, кызыклы мәзәкләр сөйләделәр, төрле уен-бәйгеләр оештырдылар. Аннары татар Яшьләре Союзы җитәкчесе Наҗия Ибраһимова алдан игълан ителгән "Ашлык – байлык” фотоконкурсында катнашучылар исемлеге белән таныштырып, җиңүчеләрне билгеләде. "Тәмле ашханә” номинациясендә - Әлфия Алексеева, "Тылсымлы ашъяулык”- Равия Саттарова, "Тел йотарлык”- З. Шәрипова беренче урынга чыктылар. Пешереп алып килгән ашлар буенча тамашачылар мәхәббәтен дә Р.Саттарова яулады. Җиңүчеләргә Мактау кәгазьләре һәм бүләкләр тапшырылды. Аннары кунакларны бәйгедә катнашучылар тәкъдим иткән татар ашлары белән тулган өстәлләргә чәй эчәргә чакырдылар. Шул арада "Шатлык” балалар ансамбле (җитәкчесе З.Шәрипова) үзләренең матур җырларын башкарып, тамашачыларны шатландырдылар.

Р.КАНГАЗИНА.