Шундый шигъри исем белән "Төзүче” милләтләр мәдәнияте йортының татар бүлеге каршында эшләп баручы "Гүзәл” (җитәкчесе Нәсимә Аксанова) яшьләр бию ансамбле ел буена башкарган хезмәтләренә йомгак ясап, отчет концерты оештырды. Тамашачыларга, ансамбльдәге яшьләр белән таныштыру максатыннан, бәйрәмчә бизәлгән сәхнәдәге экранда видеоролик тәкъдим ителде. Аннары сәхнәгә чараны алып баручы Гөлфия Хәлитова белән Төмән шәһәре 52 нче мәктәбенең 2 нче сыйныф укучысы Резедә Кирамова чыгып, саф татар телендә кунакларны сәламләп, бай телебезнең бар матурлыгын кулланып, тамашачыларны серле бию дөньясына алып киттеләр. Резедә сәхнәдә үзен тота белүе, оста шигырь сөйләве белән бик тиз тамашачы мәхәббәтен яулады. Биючеләрнең һәр чыгышын да халык көчле алкышларга күмде. Җырчы Чулпан Акъярлының үтә дә моңлы тавышы тамашачыны сагышларга салса, Ренат Әхтәриевның үзенчәлекле көр тавышы аларны дәртләндерде. Концерттан зур канәгатьлек кичергән, ял итеп, илһамланган халык бәйрәм оештыручы Г.Хәлитовага чын күңелдән рәхмәт белдерделәр.

Р.КАНГАЗИНА.