Аллаһы Тәгалә бөтен дөньядагы әйберне парлап барлыкка китергән. Шулай ук һәрбер кешенең бу дөньяда үз пары бар. Зилә белән Мөхәммәт Назыровлар бер җанның ике яртысы, дип уйлыйм мин. Чыннан да, алар кыяфәтләре белән дә, эчке табигатьләре белән дә бер-берсенә бик килешеп торалар. Икесе дә яшь медицина хезмәткәрләре. Зилә медицина колледжын тәмамлап, Төмәннең өченче бала тудыру йортында акушерка булып эшли, ә Мөхәммәт медицина академиясендә укыган һәм хәзерге вакытта «Ашыгыч ярдәм»дә врач вазифасын башкара.

Зилә белән Мөхәммәт бер ел элек таныштылар, шул вакытта инде алар икесе дә мөселман динен тота башлаганнар. Шуның өчен аларның аралашулары да Ислам шартлары буенча үткән, бер айдан соң инде яшь егет әнисе белән Зиләнең өенә танышырга һәм кул сорарга барган. Ә инде 12 июнь көнне кызның өендә матур итеп никах туе үтте. Шул көндә дөньяга тагын бер мөселман гаиләсе туды. Алар бер-берсен тыңлап, бер-берсенә таяныч булып яшиләр.  Ә якын киләчәктә, Алла боерса,  бу гаиләне әти-әни бәхете көтә.

Мин Зилә белән бик дус, бергә мәктәптә укыдык. Ул мине һәрчак үзенең сабырлыгы, гадилеге белән сокландырды. Аларның Мөхәммәт белән бер-берсен табуына бик куанам. Аларга мөселман гаилә бәхетен күрергә, балаларын исән-сау үстерергә  насыйп булсын.

Э. ИСКУЖИНА.