Мин аның җырлаганын быел  "Татар егете” конкурсы уздырган кастингта ишетеп, тавышына сокланган идем.  Финалга узмаганын белгәч, күңелдә авыр тәэсир дә калган иде. Икенчегә аны шәһәр мәдәният үзәге оештырган "Яшьләр язы” фестивалендә очраттым. Аның чыгышын тамашачы алкышларга күмде, шулай ул хаклы рәвештә 1 нче урынга чыкты. Айдар Төмән районы, Муллаш авылында яши, аңа 21 яшь. Күптән түгел ул армия сафында хезмәт итеп кайткан, әле вакытлыча Төмән ЖБИ–5 оешмасында каравылчы булып эшли. Ә өйрәнгән һөнәре аның – пешекче-кондитер, хәзергә ул җайлырак  эш урыны эзли. Айдар кече чактан җырлый, музыка мәктәбендә аны Төмәннән килеп укыткан Лилия Азатовна Сысоева гармунда уйнарга өйрәткән. Ул "Таң йолдызы” өлкә конкурсында катнашып призлы урыннар алган. Әмма авыл сәхнәсенә чыгып җырларга мәктәпне тәмамлагач кына кыюлыгы җиткән. Бәлки, Нурия апасы Юсупова кебек тынгысыз җан, һәр яктан ярдәм итеп торган кеше булмаса, ул бу шөгылен күптән ташлаган да булыр иде. Буш вакытларында Айдар футбол, волейбол уйнарга йөри. Күп вакытын йорт эшләренә, спортка биргәнгәдер, күңеленә ошаган кызны да тапмаган. Ә аңа инсафлы, акыллы, сабыр холыклы кызлар ошый икән.

Р.КАНГАЗИНА.