1755 елның 25 январь көнне императрица Елизавета Петровна "Мәскәүдә Университет һәм ике гимназия ачу Указына” кул куйган. Шуннан соң 25 январь официаль университет һәм студент көне дип санала. Хәзерге вакытта да Россия студентлары, концертлар куеп, төрле конкурслар ясап, үз бәйрәмнәрен гөрләтеп үткәрәләр. Чөнки студент тормышы –иң күңелле чак, дип әйтергә мөмкин. Һәрбер кешегә бу вакытлар төрле яклары белән истә кала.

Максим Сагидуллин (элекке студент): "Студент чакларым беренче тапкыр группа белән очрашу һәм танышу вакытындагы якты мизгелләр белән истә калды. Беренче курсларның дебют концерты бик кызыклы булды. Гомумән алганда, бөтен студент тормышым күңелле үтте, чөнки безнең группабыз бик дус иде, бер-беребезгә авылларга кунакка барып йөри идек”.

Айгөл Абдуллина (элекке студент): "Мин студент чагымның иң кызыклы өлеше итеп беренче уку көннәрендәге мизгелләрне әйтер идем. Чөнки шул көннәрдән яңа тормыш башлануы тоела, яңа кешеләр белән аралашасың. Безнең группабыз беренче көннәрдән үк дуслашып китте. Без бик еш бергә җыелып, кемгәдер кунакка бардык. Күңелле яшәдек”.

Альберт Шәрипов (хәзерге студент): "Ә мин параларга йөрергә яратам, чөнки безнең факультетта акыллы һәм бай рухлы, алдынгы карашлы укытучылар эшли. Алар белән төрле темаларга дискуссияләр алып барырга була. Ләкин факультетның иҗат тормышында катнашмасам, студент чагым шул хәтле кызыклы булмас иде”.

Э. Искужина.