Башларына түбәтәй кигән, нәфис яулыклар бәйләгән кыз-егетләр бай табын алдына утырышкач, мәчет имамы Раил хәзрәт Мәхмүтов олуг бәйрәм белән котлап, Коръән укыды һәм сүзне Мәскәү кунаклары – Данил Шәрәфетдинов белән Әнвәр Утамбаевка бирделәр. Алар оешманың 2005 нче елдан башлап ел саен Корбан бәйрәмен зурлап, илебезнең төрле шәһәрләренә барып корбанлык чалып, аш уздырулары, быел бу миссия белән Төмән өлкәсенә килүләре турында сөйләделәр. "Яшь буын” оешмасы җитәкчесе Фәрит Корманов яшьләр белән тыгыз һәм җылы мөнәсәббәттә эшләүче, соңгы 4 елда яшьләр өчен махсус Корбан бәйрәмен оештырырга ярдәм иткән Раил хәзрәткә һәм дә изге йөкләмә белән килгән кунакларга рәхмәтен белдерде. Ашка дога укылып, ашап алгач, Раил хәзрәт тыңлаучыларга вәгазь сөйләде, аннары намаз укыганнан соң, барысы җыелышып шәһәр милләтләр мәдәнияте йортына концерт карарга юл алдылар. Анда халыкны тәбрикләү сүзләре белән татар мәдәнияте бүлеге җитәкчесе Зөһрә Кожевникова каршы алды һәм сүзне шәһәр хакимияте башлыгы И.Г.Горшковка тапшырды. Ул мөселманнарның шатлыкларын уртаклашып, бәйрәм белән котлады, киләчәктә дә ислам кануннарына таянып үзара дус-тату яшәргә чакырды. Ф.Корманов татар мәдәниятен, телебезне саклау, үстерү юнәлешендә башкарган фидакарь хезмәтләре өчен З.Кожевниковага ТР мәдәният министрлыгы исеменнән Мактау грамотасы, ә Зәйтүнә Фәйзуллина, Саҗидә Вахитова һәм Рәсимә Бакиева бөтендөнья татар Конгрессы исеменнән Рәхмәт хатлары тапшырды. Аннары халыкка "Сандугач” (җитәкчесе З.Кожевникова) халык җыр һәм Сәел авылы кызлары ансамбльләре матур җырлар, "Гүзәл” (Н.Аксанова) бию ансамбле төрле биюләр тәкъдим иттеләр. Кичә "Кардәшлек” оешмасының башкарган эшләрен күрсәтү, танышу белән йомгакланды. 

Р.КАНГАЗИНА.