Бу көннәрдә редакциягә Вагай районы, Рәнчек авылында туып үскән, хәзерге көндә Төмәндә яшәүче милләттәшебез Юма Алимбай улы Алимбаев килде. Ул 10 июль көнне Омск өлкәсе, Усть-Ишим районы, Ильчибага авылында мәчет ачылу тантанасында катнашкан.

 - Төмәннән өлкә мөселман казыят идарәсе җитәкчесе Фатыйх хәзрәт Гарифуллин һәм Сабанак мәчете имамы Рәхимҗан хәзрәт Бохардинов килергә тиешләр иде, һава торышы бозылуы аркасында (яңгыр явып юл юылды) мөмкинлекләре булмады.

Мәчет авыл халкы көче белән агачтан салынды. Әүвәлгесе ишелгән, аннары мәчет вазифасын бер иске йорт үтәгән. Хәзер менә яңа иман йорты үзенең ишеген ачты. Халык күп иде. Район хакимияте башлыгы урынбасары котлап чыгыш ясады. Мәчет ачылуы алдыннан өч сәгать концерт карадык. Егерме елдан артык эшләп килүче "Умырзая” Омск халык татар-башкорт фольклор ансамбле артистлары якташларын чын күңелдән ял иттерделәр. Алар өчен автобусны "Енисей” корпорациясе президенты Тамир Алимбаев  фирмасыннан бирде. Тантанадан соң халыкны мул табын ашы көтте. Бәйрәм уңаеннан бер ат, сарыклар суелды. Авылдашлар спонсорларга, артистларга, мәчет төзүдә өлеш кертүчеләрнең һәрберсенә  рәхмәтләрен белдерделәр, - дип Юма Алимбай улы сөйләде.

Ул үзе дә башта мәчеткә 5 мең акча, ә тантанада ковер һәм картина бүләк иткән. 

Ильчибага авылы халкы мәчетле булды.  Ул һичкайчан буш тормасын. Яше–картына шатланышып намазга йөрергә, вәгазьләр тыңларга, дини бәйрәмнәрне үткәрергә насыйп итсен.

Д.ФӘХРЕТДИНОВА.