Зөлхиҗҗә аенда билгеле ниятләр белән үтелгән гамәл хаҗ дип атала. Ул Ислам диненең 5 баганасының соңгысы, аны үтәр өчен һәр ел саен миллионлап кеше Кәгъбәтулла янына баралар. Безнең якташларыбыз да бу изге гамәлне үтәргә тырышалар. Күптән түгел татар яшьләр союзында рухи юнәлешнең җитәкчесе Р.Мамеев 2011, ә хиҗрә буенча 1432 нче елда барып кайткан хаҗилар белән очрашу оештырды.

Мәҗлесне Искәндәр хәзрәт һәм Фәрит хәзрәт Аллаһы Тәгаләдән исәнлек-саулык, иман сорап дога белән башладылар. Быел алар үз хәлләре белән хаҗ кылдылар һәм тәҗрибләрен яшьләр белән уртаклаштылар. Аннары кара ташның барлыкка килүен, хаҗ турында хәдисләр әйтеп киттеләр.  Килгән кунакларга Гарәбстанда төшергән фотоларын күрсәтеп, бу изге гамәлне үтәгәндә ничек дөресрәк булуын, нәрсә эшләргә, кияргә кирәклеген сөйләделәр һәм күрсәтеп тә киттеләр. Искәндәр хәзрәт Кәгъбәтулла янында укырга тиешле догаларны әйтте, аларның берсе: "Йә Аллам, мин Синең алдыңда..”, - дип башлана. "Бу изге җирләрдә йөргәндә сүз белән аңлатмаслык хисләр күңелгә төшә”, - дип сөйләде Искәндәр хәзрәт, "Кара таш янына килеп басканда, күздән яшьләр ага башлый,”- дип кушылды аңа Фәрит хәзрәт.

Яшьләрнең хаҗиларга үз сораулары да булган, күбесе хаҗга бару өчен күпме акча кирәген, нинди фирма аркылы барырга була һәм башка оештыру моментлары турында кызыксындылар. Әлбәттә, аларның да Аллаһы Тәгаләнең бурычын үтәргә ниятләре бар. Хаҗга барып килү рухи һәм физик яктан бер дә җиңел түгел. Ходай Тәгалә бөтенебезгә бу изге гамәлне кылырга исәнлек-саулык һәм көч бирсен.

Э.МИРГАЗИЗОВА.