Изге хаҗ сәфәреннән кайткан якташларыбыз мөселман кардәшләребез белән очрашып, үзләренең шатлыкларын уртаклашу, йөргән урыннары турында сөйләү, исәнлеккә-саулыкка Коръән уку өчен җыелышуларын дәвам итәләр. Бу юлы өченче мәртәбә хаҗи булган Индрәй мәчете имамы Тимергали Гайнетдинов үзенә чакырды. Изге гамәл белән халкыбызны таныштырырга материал җыярга "Очрашулар” телетапшыруы алып баручысы Ләйсән Хөрмәтуллина да килгән иде. (Бер уңайдан, аннан тапшыру турында да сораштык, февральдән ярты сәгать вакыт вәгъдә итәләр, кайсы каналда күрсәтеләсе әлегә билгеле түгел, диде ул).

Фатыйх хәзрәт Гарифуллин Коръән укыганнан соң, Тимергали хаҗи: "Элегрәк елларда 55-65 градус эсседә дә Аллаһ йортында тиешле вазифаларны башкарган идек, быел бераз җиңелрәк булды. Ләкин анда җиңеллек эзләп бармыйсың, ул безнең бурычыбыз. Бу бурычыбызны үтәүдә ярдәм иткән губернаторыбыз В.Якушевка, милләтләр эшләре комитеты рәисе Е.Воробьевка чиксез рәхмәтләребезне белдерәбез, - дип сөйләде. – Аллаһ Раббыбыз күргән авырлыкларыбызны савап итеп, кылган хаҗларыбызны кабул кылса иде, бала-нәселләребезгә, авылдашларыбызга шушы изге җирләргә барырга, иманнарын ныгытып кайтырга насыйп итсә иде”, - дип теләкләр теләде. Аннары бергәләшеп зәм-зәм суын эчтеләр. Ә Тимергали хәзрәтнең нәселе зур, янындагы оныгының гына дүрт баласы йөгереп йөри. Аларга иман нурлары иңеп, тәүфыйклы, миһербанлы булып үссеннәр, бабалары шикелле иң олы ай – Корбан аенда Кәгъбәтулланы күрергә язсын үзләренә.

Г.ВӘЛИЕВА.