Изге Рамазан аеның соңгы көннәрендә Россиянең Азия өлеше дини идарәсе баш мөфтиенең хокуклы вәкиле, Төмән өлкәсе мөселман казыят идарәсе җитәкчесе Фатыйх хәзрәт Гарифуллин өлкә дини эшләре комитеты башлыгы Игорь Бобров ярдәмчесе белән алдан төзелгән программа буенча Тубыл, Ярково районнары авылларына сәяхәт ясадылар. Бу турыда безгә Фатыйх хәзрәт Гарифуллин хәбәр итте. "Беренче тукталышыбыз Калым авылында булды. Бу авылда үскән  Шәйхулла һәм Мөдәррис Юлдашевлар туган йортларын сатып алып авылдашлары өчен мәчет төзергә ниятләгәннәр. Бүгенге көндә бина түбәсе тимер белән ябылган, чоланы эшләнгән, шунда тәрәвих намазлары, авыз ачу мәҗлесләре оештырыла. Киләчәктә манара куелып, рәткә салынса, әлеге Аллаһы йорты авылның бер яме булачак.

Аннары без Ирек авылына юл тоттык. Биредә 1890 елларда салынган мәчет бинасы сакланган. Халык күп җыелды. Сөйләшеп фикер алышкач, иске мәчетне яңартудан файда юк, яңа мәчет төзергә кирәк дигән карар кылдык. Шунда ук мөселман группасы төзелде, аның җитәкчесе  итеп Әбделхак Юмашев билгеләнде. Сабанак авылы мәчетендә  бөтен эшләрне Рәхимҗан абый Бохардинов бик уңышлы башкара. Бу көннәрдә биредә ремонт эшләре бара икән. Сумкино поселогы мәчетендә мулла -  Фәтхулла абый һәм Шәмсениса Моратова белән күрештек, җыелган кунакларга газета-китаплар бүләк иттек. Соңгы тукталышыбыз - Торбы авылында булды. Биредә, Аллага шөкер, эшләр кайный. Безне әзерләнеп көткәннәр, җылы каршы алдылар, мәчеттә ифтар оештырылды, намазлар укыдык. Бу планлаштырылган программа бик эчтәлекле, файдалы булды дип курыкмыйча әйтә алам. Шушы изге чарадан авыл кешеләре генә түгел, өлкә кунаклары да канәгать калдылар. Ә инде, гомумән алганда, сәфәребез бәрәкәтле булды, планлаштырылган бер генә минутыбыз да бушка үтмәде. Иншалла, киләсе елларда да Рамазан аенда файдалы очрашулар үткәрергә насыйп булсын. Кылган хезмәтебезне Аллаһы Тәгалә кабул итәр дип өмет итәбез”, - дип сөйләде хәзрәт.

Р.КАНГАЗИНА.