Тубыл шәһәрендә төрле милләт кешеләре  иңгә-иң куеп, дуслыкта, татулыкта гомер кичерәләр. 21 нче  август көнне  ”Гаиләләр салават күпере” фестивале үтте.

Шәһәрнең мәдәният, сәнгать үзәгенең залы бәйрәмчә  бизәлгән  иде. Катнашучылар  дулкынланып  үзләренең чыгышларын көттеләр. Беренче булып сәхнәгә Санниково авылыннан килгән  Колмәмәтовлар (рәсемдә) гаиләсе чыкты, алар чыгышында татар җырлары, шигырьләр яңгырады. Зилия белән Илнар үзләренең талантлы  чыгышлары белән тамашачыларның  мәхәббәтен  яуладылар. 4 нче сыйныф укучысы  Зилия  татар эстрада  җырларын башкарырга, шигырь сөйләргә ярата, милли ризыклар  әзерләүдә әнисенең  беренче ярдәмчесе ул,  7 нче сыйныф  укучысы   Илнар  музыка коралларында татар көйләрен оста  уйный, әти-әнисен тормышта үрнәк дип саный. Фестивальдә бу гаилә  беренче урынга лаек булды. Мамшановлар, Балабановлар гаиләләренең  чыгышлары  әһәмияткә лаек булды. Бәйрәм барышында бәйрәмне алып баручылар тамашачылар белән  уеннар, милли  ашлар бәйгесе үткәрделәр. Әлеге мәдәни чараны Тубыл  шәһәренең себер татар мәдәният үзәге артистлары оештырды. Жюри әгъзалары, тамашачылар игътибарын җәлеп иткән  җиде балалы Балабановлар гаиләсе  алкышларга һәм призларга лаек булды. Гомумән, һәр гаилә  дипломнар һәм кыйммәтле, истәлекле призлар белән бүләкләнделәр. Бәйрәмдә төрле милләт гаиләләре үз милләтләренең  гореф-гадәтләрен, мәдәният байлыгын күрсәтә алдылар. Алып баручы  Альбина  Ишметова һәркемгә җылы  сүзләр, яхшы теләкләр юллады. Киләсе бәйрәмнәрдә катнашучылар саны  күбрәк булыр дип  ышаныч  белдерде.

Р.УМИТБАЕВА.