Ямбай мәктәбе музеенда  ветеран укытучы Галия Шәриф кызы Багизова җитәкчелегендә  укучы-экскурсоводлар авыл, мәктәп тарихы турында 4 сыйныф балаларына экскурсия үткәрделәр. Шушы экскурсоводлар авыл тарихы, яшәгән халкы белән бик кызыксыналар, тикшерү эшләре алып баралар.

Ямбай урта мәктәбе  Советлар Союзы Герое Рәшит Әхмәтрәшит улы Аширбековның исемен йөртә. Геройның бишенче буын туганнары – 6”б” сыйныф укучысы Галияр, 7”а” сыйныф укучысы Регина Алтынгузиннар Рәшит Әхмәтрәшит улының Бөек Ватан сугышындагы батырлыгы турында сөйләделәр.

Түбән Тәүде районының Советлар Союзы Герое А.Новопашин сугышта Р.Аширбеков белән бергә сугышкан,  үлүенең шаһиты булган. Моның турында укучыларга Галияр бәян итте.

Совет власте урнашкач, 1918 елны авылда бердәм хезмәт мәктәбе ачыла. 1920 елны беренче баскычтагы хезмәт мәктәбе барлыкка килә.Ул Нигъмәтулла хаҗиның йортында урнаша. Максаты - авыл халкының грамотасызлыгын ликвидацияләү, - дип фоторәсемнәргә таяк белән күрсәтеп Аня Нечаева (6”б” класс)  сөйләде.

Рияна Фәйзуллина (6”б” класс) шушы теманы дәвам итте.Ул пионер формасына киенгән. Сугыш вакытында пионерларның, тимур отрядларының авыр хезмәт башкаруларын хикәят итте,  пионер Советлар Союзы Геройлары белән укучыларны таныштырды. "6” сыйныф укучысы Саша Табанакова дружина, тантаналы сбор, пионер-комсомолларның законнары турында сөйләде. Дружинаның кызыл байрагын күрсәтте. Экскурсияне укучылар кызыксынып зур игътибар белән тыңладылар.

2010-2011 елларда музей җитәкчесе Галия апалары ярдәме белән 7-8 класслар укучылары – экскурсоводлар: Гөлназ Мөслимова, Асия Ташкалова, Оксана Горшкова музейда документлар карап, архивларда утырып бабалары, репрессия чорында атылган авылдашлары турында тикшереп, "Киләчәккә адым” район күләмендәге конференциядә катнашалар, призлы урыннар алалар.

Д.ФӘХРЕТДИНОВА.