Кырынкүл мәктәбендә "Ак каен” театр студиясе җитәкчесе А.Асочаков, музыка укытучысы Г.Хөсәенова, татар теле һәм әдәбияты укытучысы Х.Кирамова оештыруларында 5-6 сыйныф укучылары өчен бәйрәм үткәрелде.

     Матур итеп бизәлгән класста татар моңы яңгырады. Уртага  укучылар: Альбина Сәйфетдинова, Алсу Вәлиева, Милена Марцева, Диана Бикмуллина чыктылар. ЮНЕСКО карары буенча бүгенге көн Халыкара туган тел көне дип игълан ителгән. Дөньяда җиде меңгә якын тел бар. Шуларның 83е киң таралган, ә 383 тел бөтенләй юкка чыгарга мөмкин. Мәсәлән, силец дини телендә 1 кеше, Африка урманнарында яшәүче ючи кабиләсе телендә 5 кеше генә сөйләшә.Татар теле – ЮНЕСКО тарафыннан бөтендөнья халыкара аралашу теле дип саналган 14 телнең берсе. Бу – туган телебез белән горурланырлык мөһим фактор. Туган тел – һәркем өчен дә газиз сүз. Иң кадерле, бернәрсә белән дә алыштырылмый торган "әни”, "әти”, "әби”,”бабай” сүзләрен башлап туган телдә әйтәбез”, - дип сөйләде Алсу. Шушы укучылар тарафыннан тел турында башка мәгълүматлар, бөек шәхесләр әйтеп калдырган сүзләр дә яңгырады. Резеда Кирамова татар, Айшә Бодурова азәрбайҗан телләрендә сәнгатьле итеп шигырьләр сөйләделәр. Мәрьям Кәримова матур милли костюмда оста итеп татар биюен биеде. "Ак каен” студиясе артистлары Муса Җәлилнең "Кызыл ромашка” шигырен сәхнәләштерделәр. Укучылар бик яратып карадылар.  Бәйрәм класста утыручы барлык балаларның Габдулла Тукайның "Туган тел” җырын җырлаулары белән тәмамланды.

Д.ФӘХРЕТДИНОВА.