29 февраль көнне Ялутор милләтләр мәдәнияте үзәгендә үткәрелгән смотр-конкурсларда Ялутор, Исәт, Заводоуковск районнары балалар һәм олылар коллективлары үз талантларын күрсәттеләр. Чараның башында үзәк директоры Н. И.Бойко кунакларны өлкә татар мәдәният көннәре белән котлап, бөтен катнашучылырга уңышлар теләде. Чараны алып баручы үзәкнең татар бүлеге җитәкчесе З.Кожевникова жюри әгъзалары белән таныштырып китте. Алар: өлкә татар милли-мәдәни втономиясе башкарма директоры Т.Мирасов, өлкәнең күренекле җырчысы, композитор Җ.Рәхимова, талантлы җырчы Н.Хәкимова, өлкә татар Конгрессының мәдәният департаменты җитәкчесе В.Ташкалова, шагыйрә К.Кучковская, хореограф  М.Яценович. Сәхнәдән заманча һәм халык җырлары, мөнәҗәтләр, Татарстан һәм җирле күренекле шагыйрьләрнең туган телгә, илгә, Бөек Ватан сугышына багышланган әсәрләре яңгырадылар. Шулай ук бию ансамбльләре дә чыгыш ясадылар. Укучылар Нәүрүз, Карга боткасы, боз китү белән бәйле сәхнәләштерелгән күренешләр күрсәттеләр. Ахырда Т.Мирасов һәм В.Ташкалова катнашучыларга дипломнар тапшырдылар һәм иң-иңнәрне ике конкурсларның да финал концертларына чакырдылар.

Э.МИРГАЗИЗОВА.