Талантлы кеше бөтен эштә дә талантлы инде ул. Бу сүзләрнең дөреслегенә Олеся Рәфис кызы Тузмөхәммәтова белән танышкач тагын бер кат инандым. 18 яшьлек кечкенә буйлы, нәфис елмаючан кыз уңган гамәлләре белән сокландыра.

Олеся Төмән шәһәрендә туып үскән. 2006 елда 63 нче урта мәктәпнең 9 классын тәмамлап, сервис һәм идарә институтына укырга кергән. Быел инде ул дүртенче курста, тиздән костюмнар буенча рәссам белгечлеген алып чыгачак. Олеся үз тормышын иҗатсыз күз алдында китерә алмый. Балачактан ук ул балчыктан әйбер ясау, бисердан үрү һәм рәсем ясау түгәрәкләренә йөргән. Ә 9 класста күптәнге хыялын тормышка ашырып, сәнгать мәктәбендә укып чыккан. Күптән түгел аның иҗат эшләре, үзе уйлап чыгарган дизайн буенча төрле әйберләр (берсе рәсемдә), йомшак уенчыклар "Деловой вернисаж” галереясында тәкъдим ителә башлады. Һәрбер иҗат җимеше – уенчыкмы, статуэткамы, уникаль килеп чыга. "Композиция һәм  дизайн турында  мин озак уйламыйм, - ди яшь рәссам, - алар минем уема әллә ничек үзләре килеп керәләр. Иртән яңа туган идея белән торсам, тизрәк аны гәүдәләндерергә омтылам. Шул эшкә бөтенләй бирелеп, дәресләргә бармаган да чакларым бар”. Хәзерге көндә Олеся заказ буенча пластиктан колак алкалары, чәч кыстыргычлар, бисердан бизәнү әйберләре һәм бүтән төрле аксессуарлар ясый.

Иҗат эшеннән тыш, ул пауэрлифтинг спорт төркемендә дә үз урынын тапты һәм беренче олы разряд алды. "Мин спорт белән шөгыльләнүемә бик шатмын, – ди Олеся, – чөнки минем кебек кечкенә кызда ул көчле рухи дөнья һәм эчке табигать тәрбияләде”. Мәктәп чагыннан ук ул, кечкенә һәм  нәфис кызчык булуына карамастан, бик мөстәкыйль була. Аның һәр минуты исәптә – укырга да, эшләргә дә, иҗат итәргә дә өлгерә. Хәзерге көндә балалар бакчасында рәсем түгәрәген алып бара. Ә күптән түгел фотограф һөнәрен үзләштерү өчен курсларга йөри башлаган. Олеся үз иҗатын һәм бүтән эшләрен татар мәдәнияте белән бәйләргә тырыша, күбрәк татар яшьләре белән аралаша һәм татар булуы  белән бик тә горурлана.  Менә "Себер йолдызы-2010” конкурсына да татар биюен өйрәнү өчен барган. Хәзер инде, кастинг үтеп финалга әзерләнә. Миңа караганда, бу кыз көчле конкурент булып тора. Менә нинди талант җимешләрен тудыра безнең халык. Бу яшь талантка иҗади уңышлар һәм конкурста җиңү телим!

Э. ИСКУЖИНА.