Бәйрәмчә бизәлгән зал уртасында Г.Тукайның бала вакытына, иҗатына багышланган стенд эленгән. Янәшәдә  милли аш-суга, костюмнарга  да урын бирелгән. Үзәккә татар телен өйрәнергә йөрүче 9 нчы мәктәпнең 5-8 сыйныф укучылары өстәл артына утырганнар. Чараны татар теле укытучысы Наисә Камил кызы Гайнельянова алып барды.

Һәркем үзенең туган телен белергә тиеш. Әгәр туган телебездә сөйләшмибез икән, ул югалырга мөмкин. Туган телне балага нәкъ әни өйрәтә, карында чакта ук сабый әнисенең сөйләшүен ишетеп ята, - дип башлады ул.

Арина Баталова сәнгатьле итеп җирле шагыйрь Рәкыйп Ибраһимовның Булат Сөләймановның 60 яшьлегенә багышланган шигырен сөйләде, аның эчтәлегенә аңлатма бирде.

Укытучы укучыларга милли татар орнаменты – лалә чәчәкләрен таратты.

– Балалар, татар алфавитында ничә хәреф бар?

– 39 хәреф бар, аларның алтысы татар теленә генә хас.

– Болар нинди хәрефләр, һәрберсенә мисал китерик...

Укучыларга төрле биремнәр бирелде, алар һәрберсен уңышлы эшләделәр. Актив катнашучыларга жетоннар таратылды. Сабыйлар ”Биш пар” уенын бик яратып уйнадылар. Музыка буенча да сынау үткәрелде. Тактага мәкальләр дә яздылар. Татар халкының яраткан уены - "Йөзек салыш”ны да уйнадылар.

Балалар  хор белән Энҗе Мөэминованың "Туган телем” җырын җырладылар. Беркем дә бүләксез калмады. Илгиз Мөхәммәтшин "Уяталар”, Карина Шаматова "Гармун уйныйм” җырларын көчле, моңлы тавышлары белән башкардылар. Үзәк директоры урынбасары Рәчига Гыйниятулла кызы Фәйзуллина аларны чын күңелдән бәйрәм белән котлады һәм  мактау кәгазьләре тапшырды. С.Кошкарова, В.Синникова - рус кызлары, татар телен өйрәнергә үзәккә  үз теләкләре белән йөриләр.

Д.ФӘХРЕТДИНОВА.