Телне кешелек җәмгыяте тудырган һәм үстерә. Шуңа күрә
туган телне кеше үз баласын яраткан шикелле яратырга, тәрбияләргә тиеш. Туган телне безгә өйрәткән, аның асылларын ачкан кеше –
ана теле укытучысы Мәүлидә Назыйр кызы Сәитова. Талымхан авылы
балаларына белем биргән, ана теленә мәхәббәт уяткан укытучы хәзер инде күп
еллар лаеклы ялда. Мөлаем йөзле, кешегә игътибарлы, сабыр холыклы Мәүлидә апа
мәктәптә берничә буын балаларны укытты. Укытучы эше башка һөнәрләрдән бик
аерыла. Мөгаллим балаларга бөтен күңелен, дәртен, көчен, күңел җылысын бирә,
алар турында кайгырта, уйлана, уңышлары өчен куана. Укытучы кешене мәктәптән
авыр сумка тотып кайтканын күрәсең, ул кичләрен укучыларының дәфтәрләре янында
сәгатьләр буе утырачак. Мәүлидә апа 1932 нче елның 21 августында Ялутор
районының Күлик авылында дөньяга килә. Барлык яшьтәшләре кебек авыр сугыш
елларында белем ала, мәктәпне тәмамлаганнан соң, Тубыл шәһәренең укытучылар
мәктәбенә укырга керә. Менә яшь кызның кулында татар теле укытучысы дипломы. Бу
әле 1954 нче ел гына, ә утыз елдан соң аның кулында башка документ булачак –
"Хезмәт ветераны” дигәне. Еллар сулар кебек ага. Укытучы язмышы ул шундый, бер
буынны үстердең, икенчеләре килеп керә. Яңа укучыларда әти-әниләрен танып,
балаларында аларның сайфатларын күрә, аларны яңа уңышларга алып бара мөгаллимә. 1970 елның 5 нче августына кадәр Мәүлидә апа Ялутор
районы мәктәпләрендә башлангыч классларны, татар телен укыта. Ә безнең Төмән
районына килгәненә инде кырык ел булды. Ул утыз алты ел гомерен балалар укытуга
багышлады. Көндәлек укыту эшендә ул безгә, үзенең укучыларына, телебезнең
матурлыгын, бөеклеген, байлыгын төшендерде, үзенең эшен намус белән үтәде.
Балаларда җаваплылык хисе тәрбияләде, аларны кешелекле, намуслы булырга
өйрәтте. Без апаны, укытучылар елы һәм һөнәри бәйрәме, Өлкәннәр
көне белән котлыйбыз! Аңа корычтай сәламәтлек, озын гомер, гаилә бәхете, тыныч
картлык телибез, йөрәк җылысын бүләк итәбез. Рәйсә РӘХИМОВА, Талымхан авылы.
|